«نۇر-سۇلتاننىڭ بارلىق اۋداندارى ورتالىقتانعان دامۋعا كوشىپ جاتىر. ۇيگە جاقىن جەردە مەكتەپ، بالاباقشا، مەديتسينالىق ورتالىقتار، جۇمىس، دەمالىس جانە سپورت ورىندارى بار. بۇل قاعيدالار «نۇر-سۇلتان - جايلى قالا» باس جوسپارىندا كورسەتىلگەن.
بۇل قالا اۋداندارى اراسىنداعى تەڭگەرىمسىزدىكتى جويۋعا مۇمكىندىك بەرەدى. تۇرعىنداردى قادامدىق قولجەتىمدىلىك اياسىندا مەديتسينالىق قىزمەتتەرمەن قامتۋعا ەرەكشە كوڭىل بولدىك.
بيىل قالا اۋداندارىندا 29 «ءۇي جانىنداعى دارىگەر» نىسانى اشىلدى. ەرەكشە قاجەتتىلىگى بار بالالارعا ارنالعان وڭالتۋ ورتالىقتارى جەلىسىن ايتارلىقتاي كەڭەيتتىك» دەپ جازدى التاي كولگىنوۆ Instagram پاراقشاسىندا.
ونىڭ ايتۋىنشا، تەك وسى جىلى عانا 5 ءىرى وڭالتۋ ورتالىعى اشىلعان. اكىم وسى سالادا اتقارىلىپ جاتقان ءىس-شارالاردى تولىق بايانداپ شىقتى.
ءبىرىنشى. وسى اپتادا ەلباسىنىڭ قاتىسۋىمەن 1№ قالالىق بالالار اۋرۋحاناسى بازاسىندا تۇڭعىش پرەزيدەنت قورى مەن «سامۇرىق-قازىنا» قولداۋىمەن «قامقورلىق» وڭالتۋ ورتالىعى اشىلدى. بۇل د ت س پ دياگنوزى بار 600 گە جۋىق بالانى جىل سايىن قوسىمشا تەگىن مەديتسينالىق كومەكپەن قامتۋعا مۇمكىندىك بەرەدى.
ورتالىقتا بالالارعا تىرەك-قيمىل اپپاراتىن ەمدەۋ-قالپىنا كەلتىرۋ تەراپياسىن جۇرگىزەدى، زياتكەرلىك دامۋمەن اينالىسادى، زاماناۋي مەديتسينالىق جابدىقتارمەن جابدىقتالعان ينتەراكتيۆتى بولمەلەر بار.
ەكىنشى. وڭ جاعالاۋدا ورنالاسقان جاڭا وڭالتۋ ورتالىعى (ءۋاليحانوۆ كوشەسى) اۋتيزم دياگنوزى بار بالالارمەن اينالىسادى. بۇل جوبا بولات وتەمۇراتوۆ قورىمەن بىرلەسىپ جۇزەگە اسىرىلدى. ورتالىق اۋتيستىك سپەكتر اۋرۋلارى بار بالالاردى P عا كوبىرەك قامتۋعا مۇمكىندىك بەرەدى. - سول ۇيدە تسەرەبرالدى سال اۋرۋى، اۋتيزم جانە باسقا دا ءبىرقاتار اۋرۋلارى بار بالالارمەن اينالىساتىن تاعى ءبىر وڭالتۋ ورتالىعى اشىلدى.
ورتالىقتىڭ قۋاتى كۇن سايىن 200 پاتسيەنتتى قابىلداۋعا مۇمكىندىك بەرەدى.
- ەسىل اۋدانىندا پسيحولوگيالىق- مەديتسينالىق- پەداگوگيكالىق كەڭەس بەرۋ ورتالىعى اشىلدى. مۇندا ماماندار ەستۋ، تىرەك-قيمىل اپپاراتى، كورۋ، سويلەۋ، قارىم-قاتىناس جانە مىنەز-قۇلىق بۇزىلىستارى بار بالالارعا تەكسەرۋ جانە كومەك كورسەتۋمەن اينالىسادى.
- سونىمەن قاتار، ءبىرقاتار مەكتەپتەردە ينكليۋزيانى قولداۋ كابينەتتەرى اشىلدى. وسىنداي كابينەتتەرى بار مەكتەپتەر سانىن جوسپارلى تۇردە ۇلعايتامىز.
ءۇشىنشى. جاڭا ۇيلەرىمىزدىڭ ءبىرىنشى قاباتىندا بيزنەس نىساندارىن اشپايمىز. مەملەكەت باسشىسىنىڭ تاپسىرماسى بويىنشا الەۋمەتتىك نىسانداردى اشامىز:
مەديتسينالىق ورتالىقتار، پوليتسيا پۋنكتەرى، وڭالتۋ ورتالىقتارى، بالاباقشالار جانە باسقا.
ءتورتىنشى. زاعيپ بالالارعا ارنالعان بالاباقشانىڭ، تاعى ەكى ءىرى وڭالتۋ ورتالىعىنىڭ، يپپوتەراپيا ءۇشىن يپپودروم بازاسىندا جابىق مانەجدىڭ قۇرىلىسىن جۇرگىزىپ جاتىرمىز، ينۆاتاكسي سانىن ەكى ەسەدەن استام ۇلعايتتىق. ءبىراق بۇل شارالار كومەكتى قاجەت ەتەتىن جانداردى تولىق قامتۋ ءۇشىن جەتكىلىكسىز. بۇل باعىتتى ءارى قاراي دا دامىتامىز.
«ءبىز ءۇشىن ەرەكشە بالالاردىڭ اتا- اناسىنىڭ ولاردىڭ العاشقى قادامىن كورۋى، العاشقى سوزدەرىن ەستۋى جانە ەم كەزىندە وڭ ديناميكا كورۋى وتە ماڭىزدى» دەپ اتاپ ءوتتى قالا اكىمى.