بۇل ءىس- شارا سول كۇنى بۇقارالىق اقپارات قۇرالدارىندا قالاي كورسەتىلگەن جانە تۇڭعىش پرەزيدەنت نۇرسۇلتان نازاربايەۆتىڭ العاشقى يناۋگۋراتسياسى قالاي وتكەنىن «قازاقپارات» ح ا ا بۇرىنعى جانە قازىرگى تىلشىلەرى ەسكە ءتۇسىردى. 90-جىلداردىڭ باسىندا اگەنتتىك قازتاگ دەپ اتالدى. الماتىداعى كوررەسپوندەنتتىك بيۋرونىڭ بۇرىنعى جەتەكشىسى سارا مۇستافينا ءبىزدىڭ تىلشىمىزگە قازاقستاننىڭ تاۋەلسىزدىگىن جاريالاعان كۇن تۋرالى ايتىپ بەردى.
«1991 -جىلدىڭ 16-جەلتوقسانى - ءبىزدىڭ مەملەكەت ءۇشىن وتە ماڭىزدى تاريحي كۇن. قازاقستان تاۋەلسىزدىك الدى، الەم كارتاسىندا جاڭا مەملەكەت پايدا بولدى. ءبىز بۇل حابارلامانى باس رەداكتور تامارا گەورگيەۆنا توليكينامەن وقىپ، ونى بارلىق بۇقارالىق اقپارات قۇرالدارىنا جىبەردىك. ءۇش ساعاتتان كەيىن ءبىرىنشى بولىپ قازاقستاندى تۇركيا مەملەكەتى مويىندادى. بۇل جاڭالىق «قازتاگ حابارلاعانداي»، - دەگەن تاقىرىپپەن بۇكىل الەمگە تەز تارادى. سودان كەيىن كوپتەگەن ەلدەردىڭ وسىعان ۇقساس باسقا رەسمي مالىمدەمەلەرى شىقتى. سول كەزدەگى جاس مەملەكەتتىڭ - جاڭا باسقارۋ ساياساتىن قالىپتاستىرۋ، ءوزىنىڭ قۇرىلىمدارى مەن بولىمدەرىن قۇرۋ، ولاردىڭ ءبىرىنشى باسشىلارىن تاعايىنداۋ جانە تاعى باسقالار ءبىزدىڭ اگەنتتىكتىڭ جاڭالىقتار لەنتاسىندا كورىنىس تاپتى»، - دەپ ەسكە الادى سارا مۇستافينا.
نۇرسۇلتان نازاربايەۆتىڭ پرەزيدەنت رەتىندە العاشقى انت بەرۋ ءراسىمى 1991 -جىلى 10-جەلتوقساندا الماتىداعى رەسپۋبليكا سارايىندا جوعارى كەڭەس دەپۋتاتتارىنىڭ قاتىسۋىمەن ءوتتى. قازتاگ (قازىرگى «قازاقپارات» - اۆتور) فوتوتىلشىلەرى سول كۇننىڭ كۋاسى بولدى.
« ۇلىقتاۋ الماتىداعى لەنين سارايىندا (قازىرگى رەسپۋبليكا سارايى) ءوتتى. وندا كوپتەگەن جۋرناليستەر مەن فوتوگرافتار بولدى. ولاردىڭ ىشىندە بىزدە بارمىز. بارلىق ب ا ق شاقىرىلدى، سوندىقتان ءىس- شاراعا قاتىسۋ قيىن بولعان جوق. بارلىعى جاقسى ءوتتى. سالتاناتتى ءراسىم 1,5-2 ساعاتقا سوزىلدى. پرەزيدەنت كۇلىمسىرەپ، ءوزىن لايىقتى ۇستادى. ول اقساقالدار شاپان جاۋىپ، ادەمى بەلبەۋدى ۇسىنعاندا بايىپتى بولدى. مەندە ءتىپتى فوتوسۋرەت بار»، - دەيدى اگەنتتىكتىڭ بۇرىنعى فوتوگرافى اناتولي ۋستينەنكو.
الماتىداعى العاشقى يناۋگۋراتسيادا اقىن شاكەر ابەنوۆ ەلباسى نۇرسۇلتان نازاربايەۆقا باتا بەرىپ، يىعىنا شاپان جاپتى. بۇل ءساتتى ءفوتوتىلشى الەكساندر پاۆسكيي ءتۇسىرىپ الدى.
«بۇل كۇنى قازتاگ- تان ءۇش فوتوتىلشى بولدى - يوسيف لۆوۆيچ بۋدنيەۆيچ، اناتولي ۋستينەنكو جانە مەن. مەن بۇل تاريحي ءساتتى ءتۇرلى- ءتۇستى سۋرەتكە ءتۇسىردىم. سودان كەيىن ءبارىمىز كەڭسەگە بارىپ، فوتولاردى شىعاردىق. باسىلىمدارعا ەڭ ءساتتى جانە ادەمى شىققاندارىن تاڭداپ الدىق. ارينە، باسشىلىقپەن كەلىسە وتىرىپ. سودان كەيىن، كۋرەر ارقىلى سول كەزدەگى بارلىق گازەتتەرگە جەتكىزىلدى. ولار ءبىرىنشى بەتتەرىندە جاريالادى»، - دەپ ەسكە الدى الەكساندر پاۆسكي.