تاۋەلسىزدىك جىلدارى تۋعان ەل ماقتانىشتارى
ولاردىڭ ىشىندە ەل ەكونوميكاسىنا، سپورت سالاسىنا ەرەكشە ەڭبەك ءسىڭىرىپ جۇرگەن ازاماتتار بار. بۇگىن جاقسىلىقتىڭ جارشىسى سياقتى ەگەمەندىكپەن جارىسا تۋعان تاۋەلسىزدىكتىڭ ماقتانىشتارى تۋرالى جازۋدى ءجون كوردىك.
ولاردىڭ ءبىرى - ادىلەت تيكانوۆ. 29 جاستاعى جىگىت الماتى سيركىندە جۇمىس ىستەيدى. جاس اكروبات 1991 -جىلى 21 -قىركۇيەكتە پاۆلودار قالاسىندا تۋعان. 1999 -جىلى الماتىعا وتباسىمەن كوشىپ كەلگەن. تالعار اۋدانىنىڭ پانفيلوۆ اۋىلىندا ءبىلىم العان.
«بالا كەزىمنەن break dance بيىنە قۇمار بولىپ، كوشە اكروباتيكاسىنا اۋەس بولدىم. ءبىراق، سيرك ءارتىسى بولۋدى ويلاماپپىن. بالا كەزىمدە پوليتسيا قىزمەتكەرى بولۋدى ارماندادىم. ەسەيگەن سوڭ دوستارىم جۇسىپبەك ەلەبەكوۆ اتىنداعى ەسترادا جانە تسيرك كوللەدجىنە تۇسە باستادى. مەن دە باعىمدى سىناپ كوردىم. وسىلايشا، وقۋعا گرانتقا ءتۇسىپ كەتتىم»، - دەدى ادىلەت. جاقىندا ادىلەت «ۋكراينا تالانتى» ، كىتايدا وتكەن «Central Asia» شوۋلارىنا قاتىسىپ كەلدى.
«قاڭتاردا «British got talent» شوۋىنا قاتىسۋعا دايىندالىپ جاتىرمىز. جاقىندا شىعارماشىلىق ۇجىم ۆيدەوكاستينگىدەن ءوتتى. ودان ارى قاراي مونتە- كارلودا (موناكو) وتەتىن فەستيۆالگە قاتىسامىز. باسقا دا فەستيۆالدەردەن باس جۇلدە، التىن، كۇمىس، قولا جۇلدەلەر الىپ ءجۇرمىز»، - دەدى ول. ادىلەتتىڭ ايتۋىنشا، قازىر بالالاردا كوپ مۇمكىندىك بار.
«ءبىزدىڭ بالا كەزىمىزدە كامپيت جەۋدىڭ ءوزى قۋانىش بولاتىن. قازىر بالالاردا ۇيالى تەلەفون، قالاعان ويىنشىعى، كيىمى - بارلىعى بار. ولار تارشىلىق كورمەگەن. مۇنىڭ بارلىعى - تاۋەلسىزدىكتىڭ ارقاسى! قازىر مەملەكەت تاراپىنان جاستاردىڭ دامۋىنا، ءبىلىم الۋىنا، قالىپتاسۋىنا بارلىق جاعداي جاسالعان. سوندىقتان، جاستار وسىنى باعالاۋى كەرەك. ولار بارىنشا ءبىلىم الىپ ەلىن شەتەلدىك ارەنالاردا پاش ەتۋگە ۇمتىلۋى ءتيىس»، - دەدى ول.
ال بالۋان، قازاقستان سپورت شەبەرى دامير كۇزەمبايەۆ 1991 -جىلى 2-قاراشادا تۋعان. 13 جاسقا دەيىن تاەكۆاندو، ودان كەيىن كۇرەسپەن اينالىسقان. 2007 -جىلدان باستاپ دامير جاڭاباي وسپانوۆتان ءتالىم الىپ وتىر. دامير قازاقستان چەمپيوناتىندا 2 كۇمىس، 2 قولا جۇلدە العان. ال 2016 -جىلعى قازاقستان بىرىنشىلىگىندە چەمپيون اتاندى.
«ەڭ باستىسى، سپورتتا تۋعان ەلىمنىڭ مەرەيىن كوتەرۋ - ماقساتىم. جەڭىس تۇعىرىندا تۇرعانداعى سەزىمدى ايتىپ جەتكىزۋ مۇمكىن ەمەس. بارلىق جاستار تۋعان ءتىلىن سىيلاپ، ۇلتتىق رامىزدەرىن قۇرمەتتەپ تۇرسا - نۇر ۇستىنە نۇر»، - دەدى ول.
ءداميردىڭ شەتەلدەگى العاشقى جەڭىسى 2008 -جىلى تاشكەنتتە وتكەن ازيا چەمپيوناتىندا بولدى. 2013-19 -جىل ارالىعىندا وتكەن ازيا چەمپيوناتتارىنان ول جۇلدەسىز قايتپاعان. نيكيتا فليپوۆ 1991 -جىلى 7-قازاندا تۋعان. ول جەڭىل اتلەتيكادان قازاقستاننىڭ حالىقارالىق سپورت شەبەرى، لوندون وليمپياداسىنىڭ قاتىسۋشىسى. 2015 -جىلى بۇكىل الەمدىك ۋنيۆەرسيادادا التىن مەدال يەلەنگەن. قازىر ول جاس سپورتشىلاردى تاربيەلەۋمەن اينالىسادى
«ءوزىم تاۋەلسىز ەلدىڭ تۋماسى بولعاندىقتان، بولاشاق چەمپيونداردى ازات ويلاۋعا، جەڭىمپاز بولۋعا ۇيرەتەمىن. تاۋەلسىزدىك بىزگە ءوزىمىزدىڭ دامۋدىڭ جەكە داڭعىل جولىن تاڭداۋعا، ءوز ۇستانىمىمىزدى، ۇلتتىق يدەولوگيامىزدى قالىپتاستىرۋعا مۇمكىندىك بەردى»، - دەدى ول.