«قازاق كونسەرت» مەملەكەتتىك كونتسەرتتىك ۇيىمى نۇرسۇلتان نازاربايەۆ حالىقارالىق اۋەجايىمەن جانە «قازاقستان تەمىر جولى» ۇلتتىق كومپانياسىمەن بىرلەسىپ، مەرەكەلىك ءىس- شارالار كەشەنىن ۇيىمداستىردى، دەپ حابارلايدى قازاقپارات ءتىلشىسى.
مەرەكەلىك ءىس- شارا نۇرسۇلتان نازاربايەۆ حالىقارالىق اۋەجايىنان باستاۋ الدى. «قازاق كونسەرت» ۇيىمىنىڭ «استانا ميۋزيكل» تەاترى قالا تۇرعىندارى مەن قوناقتارىن مۋزىكالىق قويىلىممەن قۋانتتى. تەاتردىڭ تالانتتى جاستارى ۇلى ابايدىڭ «ايتتىم سالەم، قالامقاس» ءانىن، «كەرىم- اۋ ايداي» اتتى بەلگىلى حالىق ءانىن دە شىرقادى. تاۋەلسىزدىك مەرەكەسىنە ارنالعان جوبا «نۇرلى جول» ۆوكزالىندا ءوز جالعاسىن تاپتى. «استانا ميۋزيكل» ارتىستەرى بۇل جەردە بارشاعا تانىمال «اتامەكەن» ءانىن ورىنداپ، كوپشىلىكتىڭ ىقىلاسىنا بولەندى. تەمىرجولشىلاردىڭ فورماسىن كيىپ مۋزىكالىق فلەشموب باستاعان ارتىستەر كورەرمەندەردى تاڭعالدىرىپ، ەرەكشە اسەر قالدىردى. جولاۋشىلار دا انگە قوسىلىپ، پاتريوتتىق سەزىمگە بولەندى.
تاۋەلسىزدىك مەيرامىن ۇلىقتاعان جوبا بارشاعا مەرەكەلىك كوڭىل- كۇي سىيلاپ، ەلوردالىقتاردىڭ پاتريوتتىق رۋحتارىن كوتەردى. سونداي- اق «قازاق كونسەرت» ۇيىمى ۇيىمداستىرعان بۇل جوبانىڭ الەۋمەتتىك ماڭىزى دا زور. قوعامدىق ورىنداردا وتكەن وسى ەرەكشە قۇتتىقتاۋلار ارقىلى ارتىستەر مۋزىكالىق ونەردى بارشا حالىققا قولجەتىمدى ەتە ءبىلدى.