فۋتبول تاريحىنداعى داڭقتى ويىنشىلار

نۇر-سۇلتان. قازاقپارات - فۋتبول تاريحىنداعى ەڭ ۇزدىك ويىنشىلار. بۇل سپورت تۇرىندە بىرىنەن- ءبىرى اسقان تالانتتى تۇلعالار كوپ.

دەسە دە ۇزدىكتەردىڭ ۇزدىگىن France Football باسىلىمى ىرىكتەپ شىعىپتى. قالاي دەيسىز عوي؟ وپ-وڭاي... ساۋالناما ارقىلى.

France Football - فۋتبولداعى بەدەلدى باسىلىم. «التىن دوپ» يەگەرىن انىقتاعانىنان-اق باعامداي بەرسەڭىز بولادى. ال ۇزدىكتەردىڭ ۇزدىگىن دە 140 ەلدىڭ جۋرناليسىنەن ساۋالناما الۋ ارقىلى انىقتاپ شىققان. سونىمەن فۋتبول تاريحىنداعى داڭقتى ويىنشىلار كىمدەر؟

باسىلىم ۇزدىكتەردى 3-4-3 جۇيەسى (جاسىل الاڭدا فۋتبولشىلاردىڭ ورنالاسۋى) بويىنشا انىقتاعان.

ۇزدىك قاقپاشى - ليەۆ ياشين. ول «دينامو» كلۋبى مەن ك س ر و قۇرامىندا ويناعان. «التىن دوپتى» العان جالعىز گولكيپەر.

سول قاناتتاعى ۇزدىك قورعاۋشى - پاولو مالديني (يتاليا).

ۇزدىك ورتالىق قورعاۋشى - فرانتس بەككەنباۋەر (گ ف ر).

وڭ قاناتتاعى ۇزدىك قورعاۋشى - كافۋ (برازيليا).

شابۋىلعا كومەكتەسەتىن ۇزدىك جارتىلاي قورعاۋشىلار تىزىمىنە ديەگو مارادونا (ارگەنتينا) مەن پەلە (برازيليا) ەنگەن. ال قورعانىسقا كوبىرەك كوڭىل بولەتىن جارتىلاي قورعاۋشىلار ماراپاتىن حاۆي (يسپانيا) مەن لوتار ماتتەۋس (گ ف ر) العان.

سول قاناتتاعى ەڭ ۇزدىك شابۋىلشى - كريشتيانۋ رونالدۋ (پورتۋگاليا)

وڭ قاناتتاعى ەڭ ۇزدىك شابۋىلشى - ليونەل مەسسي (ارگەنتينا)

ۇزدىك ورتالىق شابۋىلشى - رونالدو (برازيليا)

باسىلىم مۇنىمەن قوسا ۇزدىكتەردىڭ ەكىنشى جانە ءۇشىنشى قۇرامىن دا جاريالادى. ونى twitter پاراقشاسىنان كورۋگە بولادى.

جوعارىداعى ۇزدىكتەر قۇرامىنا كەلىسپەيتىندەر دە كوپ. ماسەلەن، UFC چەمپيونى حابيب نۋرماگومەدوۆ ءتىزىمدى كورىپ، حاۆيدىڭ ورنىنا زيننەدين زيداندى، بەككەنباۋەر ورنىنا سەرحيو راموستى قويعان بولار ەدىم دەپ جازعان.

massaget.kz