ۇلتتىق مۋزەيدە «قازاقستان تاريحى» زالى قايتا جاڭعىرتىلدى
«بۇل زال 2014 -جىلى اشىلدى، اراعا 6 جىلدى سالىپ قايتا جاڭعىرتۋدان ءوتىپ وتىر. كەلۋشىلەردىڭ قازاقتىڭ ورتا، جاڭا جانە قازىرگى زامانداعى تاريحىمەن تانىسۋ مۇمكىندىگى بار. ودان بولەك، ХІІІ-ХХ عاسىرلار ارالىعىندا ءومىر سۇرگەن ۇلى تۇلعالاردىڭ ءومىرى مەن قىزمەتى، شىعارماشىلىعىنان سىر شەرتەتىن قۇندى جادىگەرلەر قويىلعان. جالپى ەكسپوزيتسيالىق زال بىرنەشە تاقىرىپتىق بولىمنەن تۇرادى. ولاردىڭ ىشىندە وتە قۇندى جادىگەرلەر دە بار. اتاپ ايتقاندا، تولە بي، قازىبەك بي جانە ابىلاي حاننىڭ شاپانى، سول تۇلعالار قولدانعان مورلەردىڭ كوشىرمەسى، سونىمەن قاتار قارۋ- جاراقتاردى ەرەكشەلەۋگە بولادى» - دەدى ق ر ۇلتتىق مۋزەيى «قازاقستان تاريحى» ءبولىمىنىڭ اعا عىلىمي قىزمەتكەرى سىرىم حاسەنوۆ.
ونىڭ ايتۋىنشا، اتالعان زالدا 300-دەن استام جادىگەر قويىلعان.
«زالدى قايتا جاڭعىرتۋ جۇمىسىنا مۋزەي جانە سالا ماماندارى تارتىلدى، سونداي- اق بىلىكتى تاريحشىلارمەن كەڭەس وتكىزىلدى. جاڭالاۋ جۇمىسى 1 جىلعا جۋىق ۋاقىت جۇمسالىپ، بۇگىن مىنە مەرەكە قارساڭىندا كوپشىلىك نازارىنا سالتاناتتى تۇردە اشىپ وتىرمىز»، - دەدى ول.
ايتا كەتسەك، ۇلتتىق مۋزەيدە ХІІІ-ХХ عاسىرلارداعى «قازاقستان تاريحى» زالىنىڭ سالتاناتتى اشىلۋ ءىس- شاراسى ابايدىڭ 175 جىلدىعى، ءابۋ ناسىر ءال- فارابيدىڭ 1150 جىلدىعى، ۇلى وتان سوعىسى جەڭىسىنىڭ 75 جىلدىعى جانە تاۋەلسىزدىك كۇنىنە وراي ۇيىمداستىرىلىپ وتىر.
اۆتور: ءالي يبرايەۆ