قازنەت قولدانۋشىلارى قازاقستاندا كوروناۆيرۋستىق ينفەكسياعا قارسى ۆاكسيناتسيالاۋ مىندەتتى بولاتىنى تۋرالى جاڭالىقتى تالقىلاپ جاتىر. ولار 2020 -جىلعى 24 -قىركۇيەكتەگى «مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قارسى مىندەتتى پروفيلاكتيكالىق ەگۋلەر جۇرگىزىلەتىن اۋرۋلاردىڭ تىزبەسىن، ولاردى جۇرگىزۋ قاعيدالارىن، مەرزىمدەرىن جانە حالىقتىڭ پروفيلاكتيكالىق ەگىلۋگە جاتاتىن توپتارىن بەكىتۋ تۋرالى» قاۋلىعا وزگەرىستەر ەنگىزۋ تۋرالى» قاۋلىعا سۇيەنەدى. شىن مانىندە قاۋلىدا باس تارتۋعا بولمايتىن ءماجبۇرلى ۆاكسيناتسيا تۋرالى ايتىلماعان.
- ۆاكسيناتسيا ەرىكتى تۇردە جۇرگىزىلەدى، ياعني ازاماتتار ەكپە الۋعا ءوز ەركىمەن كەلىسىم بەرۋى ءتيىس، - دەپ ءتۇسىندىردى ق ر دەنساۋلىق ساقتاۋ مينيسترلىگى.
بۇدان باسقا، 2020 -جىلعى 7-شىلدەدەگى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستە بۇرىنعىداي ق ر كەز كەلگەن ازاماتىنىڭ «ەمدەلۋگە جانە باسقا دا مەديتسينالىق ارالاسۋلاردى، ونىڭ ىشىندە پروفيلاكتيكالىق ەگۋلەردى جۇرگىزۋگە حاباردار ەتىلگەن كەلىسىم بەرۋگە نەمەسە باس تارتۋعا» قۇقىعى بار نورمالار ساقتالعان. 16 جاستاعى جانە ودان اسقان بالالاردىڭ پروفيلاكتيكالىق جانە كونسۋلتاتسيالىق- دياگنوستيكالىق كومەك الۋدان حاباردار تۇردە باس تارتۋعا قۇقىعى بار.