فۋتبولدان ۇلتتىق جانە جاستار قۇرامالارىنا جاڭا باپكەرلەر كەلدى
بۇل جونىندە قازاقستان فۋتبول فەدەراتسياسى ءمالىم ەتتى. قازاقستان ۇلتتىق قۇراماسىنا باس باپكەر قىزمەتىنە تالعات بايسۋفينوۆ كەلدى. ول 1968 -جىلى دۇنيەگە كەلگەن. فۋتبولشىلىق مانسابىندا پاۆلوداردىڭ «تراكتور» (قازىرگى «ەرتىس»)، ەرماكتىڭ «مەتاللۋرگ» ، جەززعازعاننىڭ «ەڭبەك»، ەكىباستۇزدىڭ «ەكىباستۇز» ، تالدىقورعاننىڭ «جەتىسۋ»، وسكەمەننىڭ «ۆوستوك» كوماندالارىندا وينادى. باپكەرلىك قىزمەتىندە «ەسىل- بوگاتىر»، ستەپنوگورسكىنىڭ «اقسۋ»، پاۆلوداردىڭ «ەرتىس»، ورالدىڭ «اقجايىق» كوماندالارىندا جەتەكشىلىك جاسادى.
2016-2017 -جىلداردا قازاقستان ۇلتتىق قۇراماسىنىڭ تىزگىنىن ۇستادى. قازاقستان ۇلتتىق قۇراماسى بيىل ۇلتتار ليگاسىندا س ديۆيزيونىندا سىنعا ءتۇسىپ، ءتورتىنشى توپتا سوڭعى ورىندى مىسە تۇتتى.
ال ەلىمىزدىڭ 21 جاسقا دەيىنگى جاستار قۇراماسى ەندى قايرات نۇرداۋلەتوۆ جاتتىقتىرادى. ق. نۇرداۋلەتوۆ 1982-جىلى دۇنيەگە كەلگەن. ول فۋتبولشىلىق مانسابىندا الماتىنىڭ س س ك ا- «قايرات»، پەتروپاۆلدىڭ «ەسىل- بوگاتىر» (قازىرگى « قىزىلجار»)، پاۆلوداردىڭ «ەرتىس»، ەلوردالىق «استانا»، قوستانايدىڭ «توبىل» جانە قىزىلوردانىڭ «قايسار» كوماندالارىندا ويىن كورسەتكەن. ەلىمىزدىڭ ۇلتتىق قۇراماسى ساپىندا 2003-2013 -جىلدار ارالىعىندا ويىن كورسەتىپ، 35 كەزدەسۋدە جاسىل الاڭعا شىقتى. بىرنەشە ويىندا كاپيتاندىق مىندەتتى اتقاردى. 2017 -جىلدان بەرى قازاقستان ۇلتتىق جانە 21 جاسقا دەيىنگى جاستار قۇراماسىندا باس باپكەردىڭ كومەكشىسى قىزمەتىن اتقاردى.
ەستەرىڭىزگە سالا كەتەلىك، قازاقستان 21 جاسقا دەيىنگى جاستار قۇراماسى 2021 -جىلعى ەۋروپا چەمپيوناتىنا ىرىكتەۋ ساتىسىندا التىنشى توپتا ءتورتىنشى ورىندى ساقتاپ قالدى.