«جەلمايا» جوباسىندا قوناقتا بولعان مەملەكەت جانە قوعام قايراتكەرى، عالىم، فيلولوگيا عىلىمىنىڭ دوكتورى مىرزاتاي جولداسبەكوۆ تاۋەلسىزدىگىمىزدى ساقتاپ قالۋ ءۇشىن، ونىڭ عۇمىرلى بولۋى ءۇشىن نە ىستەۋ كەرەك ەكەنى تۋرالى ايتتى.
قازىر تاۋەلسىزدىككە ءتونىپ تۇرعان قاۋىپ جوق. ول قاۋىپتى ءبىز ءوزىمىز شىعارىپ الىپ جۇرمەسەك… مەن ءبىر كەزدە «قازاق رۋعا بولىنبەيدى، رۋدان قۇرالادى» دەگەن ماقالا جازعام. سونداعى ارمان- ماقسات بولىنبەۋ عوي. وسىدان 2-3 جىل بۇرىن ماشينانىڭ ارتىنا اركىم ءوز رۋىن جازىپ الۋدى شىعارىپ ەدى. سوندا «وي، قۇداي ساقتاي گور، مىنالار ءۇي ىشىنەن ءۇي تىگىپ، بۇيرەكتەن سيراق شىعارىپ جاتىر عوي» دەپ ۋايىمداپ ەدىم. قازىر ونداي جوق، سوعان قۋانامىن. بۇل تاۋەلسىزدىكتى ساقتاپ قالۋ ءۇشىن ءبىز تۇتاس بولۋىمىز كەرەك، ءبىر بولۋىمىز كەرەك. كەشەگى قازاقتى وتىرعىزىپ- تۇرعىزعان ءۇش بيدەن، ياعني تولە بيدەن، قاز داۋىستى قازىبەك بيدەن جانە ايتەكە بيدەن بىزگە قالعان مۇرا - اسىل ءسوز بەن حالىقتىڭ ىنتىماعى. بىزگە ەڭ الدىمەن قازاقتىڭ ىنتىماعى كەرەك، باسقاسى ەشقايدا كەتپەيدى، - دەدى عالىم، فيلولوگيا عىلىمىنىڭ دوكتورى.
سونداي- اق عالىم سۇحبات بارىسىندا ەلوردانىڭ اقمولا وبلىسىنا قالاي اۋىسقانىن دا بايانداپ بەردى.
ەلوردانى اۋىستىرىپ، سارىارقانىڭ تورىنەن زاماناۋي قالا تۇرعىزۋ ويى تۋرالى نۇرەكەڭ (ق ر تۇڭعىش پرەزيدەنتى - ەلباسى نۇرسۇلتان نازاربايەۆ - رەد. تۇزەتۋى) ماعان ايتىپ، كەڭەسكەن بولاتىن. مەن: «نۇرەكە، قايدا باراسىز؟ جاعداي مىناۋ… قازىنانىڭ قالتاسى تەسىك، اقشا جوق، ەلىڭىز تىرداي جالاڭاش، جالاقى مەن زەينەتاقى 3-4 ايلاپ بەرىلمەي ءجۇر. قالاي سالاسىز بۇل قالانى؟ نە قىلاسىز كوشىرىپ؟ اتا-بابامىزدىڭ جەرى مىناۋ، اسقاقتاعان الاتاۋ، قالاي قياسىز؟ اناۋ ازىناپ تۇرعان اق بوران اقمولا دەگەنىڭىز» دەدىم. سوندا ول كىسى: «بولا جاتادى عوي، بولادى. نە بار قورقاتىن؟! مۇنىڭ دا ءوز سەبەبى بار عوي» دەدى، - دەپ ايتتى مىرزاتاي جولداسبەكوۆ.
ونىڭ ايتۋىنشا، سونداعى ماسەلە - بۇرىنعى سەلينوگراد، ودان كەيىن استانا، ال قازىرگى نۇر-سۇلتان قالامىز، ىرگەدەگى قاراعاندى، كوكشەتاۋ، پەتروپاۆل، شىعىستاعى وسكەمەن قالالارىندا قازاقتىڭ سانى دان اسقان جوق.
ءدال سول كەزدە رەسەيدە شۋلاي باستادى: «سايلاۋ وتكىزۋىمىز كەرەك، گۋبەرناتورلاردى سايلاۋىمىز قاجەت» دەپ. ال ەندى دەر كەزىندە ارەكەت ەتپەسە، مۇمكىن سونداي دۇمپۋمەنەن سول بىزگە جەتسە، ءبىز بۇلاردىڭ (جوعارىدا اتالعان قالالاردىڭ - رەد. تۇزەتۋى) بارىنەن ايىرىلار ەدىك. نازاربايەۆتىڭ كورەگەندىگىنىڭ ءبىرى وسى، - دەپ ەسكە الدى ول.