«كەرەمەت حيرۋرگ، عالىم، پەداگوگ، ناعىز دوستىڭ قازاسىنىڭ ارتى قايىرلى بولسىن... الماس ورمانتايەۆ - پروفەسسور، ۇلى اكادەميك ك. س. ورمانتايەۆتىڭ ۇلى، جىگەرلى ءارى ومىرگە قۇشتار جان. جۇزدەگەن بالا ونىڭ قولىمەن اجالدان امان قالسا، جۇزدەگەن بالالار حيرۋرگىن دايىنداپ شىعاردى... ونىڭ ومىردەن وزعانىنا سەنۋ قيىن... جاقىندارىنا قايعىرا كوڭىل ايتامىز!»، - دەپ جازدى حالىقارالىق رەپرودۋكتولوگيا اكادەمياسىنىڭ پرەزيدەنتى ۆياچەسلاۆ لوكشين Facebook پاراقشاسىنا.
الماس ورمانتايەۆ 63 جاستا ەدى. ول قازاق ۇلتتىق مەديتسينالىق ۋنيۆەرسيتەتىنىڭ بالالار حيرۋرگياسى ءبولىمىنىڭ مەڭگەرۋشىسى، «قازاقستاندىق بالالار حيرۋرگتەرى» رەسپۋبليكالىق قوعامدىق بىرلەستىگىنىڭ ءتوراعاسى بولدى، مەديتسينا عىلىمدارىنىڭ دوكتورى، پروفەسسور ەدى. ول ۇلتتىق انا مەن بالا عىلىمي ورتالىعىندا پەدياتريا جانە بالالار حيرۋرگياسى بويىنشا مەديتسينالىق ديرەكتوردىڭ ورىنباسارى بولىپ جۇمىس ىستەدى، سونىمەن قاتار بالالار حيرۋرگياسى ءبولىمىنىڭ باستىعى ەدى.
اۆتور: زارينا قاھارمان