كانادانىڭ تورونتو قالاسىندا قازاق مادەنيەتى ورتالىعى اشىلدى
ونلاين فورماتتا وتكەن شارا تاۋەلسىزدىگىمىزدىڭ 29 جىلدىعىنا ورايلاستىرىلدى. قازاقستاننىڭ كاناداداعى ەلشىسى اقىلبەك كامالدينوۆ دياسپورانى كوپتەن كۇتكەن قازاق مادەنيەتى ورتالىعىنىڭ اشىلۋىمەن قۇتتىقتاپ، بۇل ءىس-شارا ءابۋ ناسىر ءال-فارابيدىڭ 1150 جىلدىعى، اباي قۇنانباي ۇلىنىڭ 175 جىلدىعى جانە كومپوزيتور ءشامشى قالداياقوۆتىڭ 90 -جىلدىعى اياسىندا وتكەنى ەرەكشە ماڭىزعا يە ەكەنىن اتاپ ءوتتى.
«ەلشىلىك ورتالىقتى قازاق دياسپورا وكىلدەرى مەن كانادانىڭ ءارتۇرلى قالالارىندا تۇراتىن قازاقستاندىقتار ءۇشىن، سونداي- اق قازاق حالقىنىڭ ءتىلى، مادەنيەتى، داستۇرلەرى مەن ادەت- عۇرىپتارىمەن تەرەڭىرەك تانىسقىسى كەلەتىن كانادالىقتار ءۇشىن اشىپ وتىر»، - دەدى وتاندىق ديپلومات. ورتالىقتا قازاق ءتىلىن وقۋ مەن مادەنيەتىمەن تانىسۋمەن قاتار، كاناداداعى وتانداستارىمىزدى بىرىكتىرۋ مەن جاقىنداسۋعا باعىتتالعان ءتۇرلى ءىس-شارالار وتكىزىلەدى. اشىلۋ راسىمىندە قازاق ك س ر-نىڭ ەڭبەك سىڭىرگەن ءارتىسى مارات ماقسۇتوۆ ابايدىڭ اندەرىن شىرقاپ، كەزدەسۋ قوناقتارىن ءوز ونەرىمەن ريزا قىلدى.
قازاق دياسپوراسىنىڭ وكىلى، ءانشى ءاليا سەدەك قىزى ءىس-شاراعا قاتىسۋشىلاردى بۇلبۇل داۋىسىمەن ءتانتى ەتتى. ال دومبىراشى قىرانبەك التان ۇلى دومبىرانى شەبەرلىكپەن ويناۋىمەن جانە اندەرىمەن كەڭ بايتاق قازاق دالاسىنىڭ رۋحىن جەتكىزە ءبىلدى.
قازاق دياسپوراسى وكىلدەرىنىڭ بالالارى ابايدىڭ ولەڭدەرىن قازاق، اعىلشىن، فرانسۋز جانە ورىس تىلدەرىندە وقىدى. بەيرەسمي باعالاۋلارعا سايكەس، قازىرگى كەزدە كاناداداعى قازاق دياسپوراسىنىڭ سانى 12 مىڭنان استام ادامدى قۇراۋى ىقتيمال. ولاردىڭ كوپشىلىگى كاناداداعى ءىرى قالالاردا - تورونتو، مونرەال، ۆانكۋۆەر، كالگاري جانە وتتاۆادا تۇرادى.