ەلىمىزدە مۇسىلماندىق ءدىني راسىمدەرگە قاتىستى جاڭا قۇجات قابىلداندى
«بيىل قازاقستان مۇسىلماندارى ءدىني باسقارماسىنىڭ 30 جىلدىق مەرەيتويى. وسى ۋاقىتتىڭ ىشىندە ءدىني باسقارما ەل الدىندا ابىرويعا جەتتى. بۇگىن وسى مەرەيتوي اياسىندا IV رەسپۋبليكالىق يمامداردىڭ ونلاين فورۋمى ءوتىپ جاتىر. فورۋمدا ءبىرقاتار ءدىني قۇجات قايتا قارالىپ، قابىلداندى. اتاپ ايتار بولساق، «اس بەرۋ مادەنيەتى»، «زيرات جانە زيارات مادەنيەتى»، «زياتكەر يمام» قۇجاتتارى قابىلدانىپ وتىر. بۇل قۇجاتتار ادامداردىڭ ءدىني مادەنيەتىن ساقتاۋ مەن دامىتۋعا ۇلەس قوسادى دەگەن سەنىمدەمىز»، - دەدى ناۋرىزباي قاجى تاعان ۇلى.
باس ءمۇفتيدىڭ ايتۋىنشا، اتالعان قۇجاتتاردىڭ زاڭدىق كۇشى جوق، تەك قانا ناسيحاتتاۋ ماقساتىن كوزدەيدى. «مىسالى، اس بەرگەندە ادامدار ىسىراپقا بارماۋى ءتيىس. ءبىز قۇجاتتا اس بەرۋدىڭ ۋاقىتى مەن قانداي تاعامدار بولۋى ءتيىس ەكەنىن كورسەتەتىن بولامىز. سونداي- اق، زيرات پەن زيارات مادەنيەتىنە كەلسەك، قازىر وزدەرىڭىز بىلەسىزدەر قاسيەتتى ورىندارعا بارۋشىلاردىڭ سانى كوبەيىپ جاتىر. وسى ورايدا شاريعات شەڭبەرى مەن سالت- داستۇرگە ساي زيارات جاساۋدى ۇيرەتەتىن بولامىز. ياعني اسىرا سىلتەۋشىلىك بولماۋى قاجەت. بۇنىڭ بارلىعى ادامداردىڭ ءدىني ءراسىم مەن ادەت- عۇرىپتى ۇستانۋ مادەنيەتىن قالىپتاستىرۋ ماقساتىندا جاسالىنىپ وتىر»، - دەدى ول.
ءدىني باسقارماسىنىڭ باسشىسى ءمالىم ەتكەندەي، الداعى ۋاقىتتا ءدىني راسىمگە قاتىستى جاڭا قۇجاتتاردىڭ ماڭىزىن يمامدار ەل اراسىندا ناسيحاتتايتىن بولادى. بۇعان دەيىن ەلوردادا ءوتىپ جاتقان يمامداردىڭ IV ونلاين فورۋمىندا ق ر پرەزيدەنتى اتىنان ەلىمىزدىڭ ءبىرقاتار يمامىنىڭ ماراپاتتالعانى تۋرالى حابارلاعان بولاتىنبىز.
اۆتور: ءالي يبرايەۆ