قىرعىزستاننىڭ جوعارعى سوتى ەكس-پرەمەر يساكوۆقا قاتىستى ۇكىمنىڭ كۇشىن جويدى

دەرەككوز مالىمەتىنشە، يساكوۆ بىرنەشە سىبايلاس جەمقورلىق ءىس بويىنشا 18 جىلعا سوتتالعان.

پەرۆوماي اۋداندىق سوتىنىڭ شەشىمى بويىنشا، ماۋسىمدا ەكس-پرەمەر بىشكەكتەگى مۇراجايدى جانە چولپون-اتاداعى يپپودرومدى قايتا جاڭعىرتۋعا بولىنگەن مەملەكەت قاراجاتىن ىسىراپ ەتكەنى ءۇشىن كىنالى دەپ تانىلعان.

ول 12 جىلعا باس بوستاندىعىنان ايىرىلىپ، وعان 247 ميلليون سوم ايىپپۇل سالىندى.

«اكيپرەسس» مالىمەتىنشە، سول كەزدە يساكوۆ «بىشكەك» جىلۋ ەلەكتر ستانتسياسىن جاڭعىرتۋ جوباسىن ىسكە اسىرۋ كەزىندە سىبايلاس جەمقورلىققا جول بەرگەنى ءۇشىن 15 جىلعا سوتتالىپ، جازاسىن وتەپ جاتقان. وسىلايشا، قىرعىزستاننىڭ بۇرىنعى پرەمەر-ءمينيسترى جالپى 18 جىلعا باس بوستاندىعىنان ايىرىلعان.

سونىمەن قاتار، جوعارعى سوتتىڭ سوت القاسى پرەزيدەنت اپپاراتىنىڭ ازاماتتىق دامۋ، ءدىني جانە ەتنيكالىق ساياسات ءبولىمىنىڭ بۇرىنعى باسشىسى ميرا قارىبايەۆاعا قاتىستى ۇكىمنىڭ كۇشىن جويدى. وعان 260 مىڭ سوم ايىپپۇل سالىندى.

ءىس پەرۆوماي اۋداندىق سوتىندا قايتا قارالادى.

ايتا كەتەيىك، 5-6- قازاندا قىرعىزستاندا بولعان وقيعالار بارىسىندا ساپار يساكوۆقا «دەمالىس» بەرىلگەن ەدى. ونىڭ مەرزىمى 13- قازاندا اياقتالعان. الايدا ول جازاسىن ءارى قاراي وتەۋ ءۇشىن كولونياعا ورالماعان. قازىرگى تاڭدا ونىڭ قايدا ەكەنى بەلگىسىز.