«سوڭعى بىرنەشە اپتا بويى احۋال ءبىرشاما تۇراقتى بولىپ تۇر. مۇنداي جايت قاۋىپسىزدىك شارالارىن ساقتاۋدى باقىلاۋعا الۋمەن بايلانىستى سياقتى. قازاقستاننىڭ سولتۇستىگىندە احۋالدىڭ ايتارلىقتاي تۇراقتانعانىن بايقاپ وتىرمىز. دەگەنمەن، جەلتوقساننىڭ سوڭى مەن قاڭتاردىڭ باسىندا كوروناۆيرۋستىڭ ورشۋىنەن جالتارا المايتىن سياقتىمىز. ويتكەنى، تىيىم شارالارىن بۇزۋ كوپ كەزدەسۋى ىقتيمال. ياعني ادامدار جاڭاجىلدىق مەرەكەلەردى اتاپ وتۋگە تىرىسارى انىق»، - دەدى ۆياچەسلاۆ لوكشين.
ونىڭ ايتۋىنشا، قازىرگى ۋاقىتتا الەۋمەتتىك اراقاشىقتىقتى بارىنشا ساقتاپ، ماسكا تاعۋ، گيگيەنالىق ساقتىق شارالارىن مۇلتىكسىز ورىنداۋ ماڭىزدى مىندەت سانالادى.
«وكىنىشكە قاراي، كوپشىلىك مۇنى ساقتاي بەرمەيدى. سول سەبەپتى حالىققا ۇنەمى جۇگىنىپ، قاۋىپسىزدىك شارالارىن ساقتاۋ ماڭىزدىعىن ءتۇسىندىرىپ وتىرعان ءجون. ەۋروپادا، رەسەيدە احۋالدىڭ قالاي بولجاپ بولمايتىن جاعدايدا دامىعانىن، ورشىگەنىن كورىپ وتىرمىز. مىنە، وسىعان بايلانىستى اۋرۋ جۇقتىرۋدىڭ ءوسىمى قالاي دەسەك تە قاڭتاردىڭ باسىندا نەمەسە جەلتوقساننىڭ سوڭىندا ارتۋى مۇمكىن. ءبىراق، ءبارى تىكەلەي وزىمىزگە بايلانىستى. ەگەر بارىنشا قاتاڭ شارالارمەن ادامداردىڭ ءوزارا بايلانىسىن شەكتەي الساق، وندا پاندەميا تولقىنى بارىنشا جۇمساق وتەرى انىق. بۇعان قوسا، ماۋسىم- شىلدە ايلارىندا اۋرۋدىڭ رەسمي تىركەلگەن كورسەتكىشتەن 10 ەسە جوعارى بولۋى ەسەبىنەن ۇجىمدىق يممۋنيتەت بىرتىندەپ قالىپتاسىپ كەلە جاتىر. ول كەزدە ادامداردىڭ باسىم بولىگى اۋرىپ قالسا دا مەديتسينالىق كومەككە جۇگىنبەدى، ءتىپتى تەكسەرۋدەن دە وتپەدى. ۇيلەرىندە ەم الدى»، - دەدى ساراپشى.
سونىمەن قاتار قازاقستاننىڭ رەپرودۋكتيۆتى مەديتسينا قاۋىمداستىعىنىڭ پرەزيدەنتى حالىقتى جاپپاي ۆاكسيناتسيالاۋعا قاتىستى پىكىرىمەن ءبولىستى.
«ۆاكسيناتسيانىڭ بىرتىندەپ باستالۋى وتە جاقسى. ءبىراق، ۆاكسيناعا قاتىستى تۋىنداپ وتىرعان ماسەلە وتە كوپ. ۆاكسينا سالىنعان كەزەڭدە جانە ونىڭ اسەرى باستالعان ۋاقىتتا ادامداردىڭ اۋىرىپ قالعان جاعدايلارى بولدى. دەمەك، بۇل پروبلەمانى تەز ارادا شەشۋ ەمەس. ارينە، ۆاكسينا جاقسى. ءبىراق، قانداي ۆاكسينانىڭ بارىنشا ساپالى ەكەندىگىن ۋاقىت كورسەتەدى. ازىرشە رەسەيلىك ۆاكسينا بىرنەشە ونداعان مىڭ ادامعا عانا ەگىلگەن. الايدا، بۇل ۆاكسينانىڭ جاقسى، ءتيىمدى ەكەندىگىن تولىقتاي تۇسىنۋگە جەتكىلىكسىز. رەسەيدە چۋمكوۆ اتىنداعى ورتالىق ءۇشىنشى ۆاكسينا دايىنداپ جاتىر. Pfizer ءوز ۆاكسيناسىن قازاقستاندا تىركەۋگە ءۇمىتتى. مەنىڭشە، 2021 -جىلدىڭ جاز ايلارىنا قاراي احۋال تۇراقتاناتىن بولادى. ۆاكسيناتسيالاۋ ەڭ الدىمەن دارىگەرلەرگە، قارت ادامدارعا جۇرگىزىلەدى. ال بۇل وتە جىلدام ورىندالاتىن جۇمىس ەمەس. ويتكەنى، ءسوز ميللياردتاعان ادامنىڭ ءومىرى جايىندا بولىپ وتىر. سوندىقتان ارقانى كەڭگە سالىپ، ەركىنسۋگە بولمايدى»، - دەدى ۆياچەسلاۆ لوكشين.