تۇماندى البيون الەمدە ءبىرىنشى بولىپ «پفايزەر» مەن «بايونتەك» كومپانياسىنىڭ ۆاكسيناسىن الدى. ۆيرۋسكە قارسى ادامداردى ەگۋ ەرتەڭ باستالماق. الدىمەن جاسى 80 نەن اسقان قارتتار، مەديتسينا قىزمەتكەرلەرى جانە قارتتار ۇيىندە تۇرىپ جاتقان ادامدار ەگىلمەك. جالپى لوندون العاشقى كەزەڭدە 40 ميلليون دوزا ۆاكسيناعا تاپسىرىس بەرگەن. ول 20 ميلليون ادامعا ەسەپتەلىپ وتىر. سەبەبى ءار تۇرعىن 2 رەت ەگىلۋى ءتيىس.
ەسكە سالا كەتەيىك، ۇلى بريتانيادا ىندەت تارالعالى 1 ميلليون 700 مىڭنان استام ادام ۆيرۋستى جۇقتىرىپ، 61 مىڭنان اسا ناۋقاس قايتىس بولدى. ەلدە وتكەن اپتادا ۇلتتىق كارانتين اياقتالىپ، ونىڭ ورنىنا ءۇش دەڭگەيلى شەكتەۋ ەنگىزىلگەن.
«ۆاكسينالار توڭازىقىشتاردا مينۋس 73 گرادۋس تەمپەراتۋرادا ساقتالىپ، قاجەت بولعان جاعدايدا عانا الىنادى. قازىر اۋرۋحانالاردا ۆاكسيناتسيالاۋ باعدارلاماسى الدىنداعى سوڭعى تەكسەرىستەر ءجۇرىپ جاتىر»، - دەيدى فارماتسيەۆت لۋيزا كوفلان.
الەمنىڭ وزگە ەلدەرى دە حالىقتى كوروناۆيرۋسقا قارسى جاپپاي ەگۋ باستالاتىنىن جاريالاپ جاتىر. مىسالى، تۇركيادا شارا الداعى جۇما كۇنى قولعا الىناتىن بولسا، ا ق ش-تىڭ نيۋ-يورك شتاتىندا ەكپە ەگۋ كەلەسى اپتادا جۇرگىزىلەدى. ەگەر امەريكالىقتار ءوز كومپانيالارىنىڭ ۆاكسيناسىن قولدانسا، تۇركيادا حالىقتى قىتاي ەكپەسىمەن ەگۋ قاراستىرىلعان. ال كورشى رەسەي استاناسىندا حالىقتى «سپۋتنيك ۆي» ۆاكسيناسىمەن ەگۋ باستالىپ كەتتى. وسى اپتادا شارا ەلدىڭ وزگە ايماقتارىندا قولعا الىنادى.