سولتۇستىك قازاقستان وبلىسى ۆەتەريناريا باسقارماسىنىڭ مالىمەتىنشە، رەسەيدە بۇگىنگى تاڭدا شوشقانىڭ افريكالىق وباسى شىعىپ، مال قىرىلىپ جاتىر. وسىعان وراي اۋىلشارۋاشىلىعى مينيسترلىگىنىڭ ۆەتەرينارلىق باقىلاۋ جانە قاداعالاۋ كوميتەتى شوشقا مەن جابايى قابانداردى، ولاردىڭ ەتىن، ونىمدەرى مەن جەم-ازىعىنا دەيىن شەكارادان كىرگىزۋگە تىيىم سالدى.
«اۆتوكولىكتەردى وتكىزۋ بەكەتىندەگى ۆەتەرينارلىق-سانيتارلىق بەكەتتە ەل اۋماعىنا وتەتىن بارلىق تاۋارلار مەن اۆتوكولىكتەر تەكسەرىلەدى. ومبى وبلىسىندا شوشقانىڭ افريكالىق وباسى پايدا بولعان ەلدى مەكەندە 24- جەلتوقسانعا دەيىن كارانتين ەنگىزىلدى. جاعدايدى قاداعالاپ وتىرمىز. شەكتەۋ شارالارى ەپيزووتيالىق جاعداي تۇزەلگەنشە دەيىن الىنبايدى»، - دەيدى س ق و ۆەتەريناريا باسقارماسىنىڭ باسشىسى بەرىك ءالجانوۆ.
قاۋىپتى اۋرۋعا بايلانىستى س ق و- دا ارنايى باعدارلاما قابىلداندى. وبانىڭ الدىن الۋ ءۇشىن شوشقا وسىرەتىن شارۋاشىلىقتار مەن جەكەمەنشىك مال يەلەرى اراسىندا ءتۇسىندىرۋ جۇمىستارى جۇرگىزىلىپ جاتىر. مامانداردىڭ ايتۋىنشا، شوشقا وباسى ادامعا جۇقپايدى. ءبىراق، اۋىرعان مال ەمدەلمەيدى، تەك جويۋ كەرەك. وعان قارسى ۆاكسينا ءالى تابىلماعان. اۋرۋ بەلگىلەرى 2-9 كۇن ىشىندە پايدا بولىپ، اۋىرعان مال بىرنەشە ساعاتتان كەيىن ولەدى ەكەن.
وبانى جۇقتىرعان شوشقانىڭ قىزۋى كوتەرىلىپ، جەم جەۋدەن قالادى، تەرىسى كوگەرىپ، وكپەسى قابىنادى. بۇگىندە س ق و- دا 235 مىڭ شوشقا بار.