شەر مۋحامماد حاليدا بۇگىندە «ىزگىلىكتە جارىسايىق» قوعامدىق قايىرىمدىلىق قورىنىڭ قۇرامىندا ءجۇرىپ، ءتۇرلى الەۋمەتتىك جوبالاردى جۇزەگە اسىرۋعا قاتىسۋدا، دەپ حابارلايدى قازاقپارات ءتىلشىسى.
حاليدا 2000-جىلى، اۋعانستان يسلام رەسپۋبليكاسىنىڭ مازاري-شاريف قالاسىندا دۇنيەگە كەلگەن. كوپبالالى وتباسىنىڭ سەگىز پەرزەنتى بولسا، ول 5- ءسى. جانۇياسى 2004-جىلى قازاقستانعا قونىس اۋدارعان سوڭ، حاليدا ورتا مەكتەپتى شىمكەنتتە ءتامامداعان.
جاستايىنان بەلسەندى وقۋشىلاردىڭ قاتارىنان كورىنگەن ول ءتۇرلى ءىس-شارالارعا قاتىسىپ، مەكتەپتى «ۇزدىك» اتتەستاتپەن بىتىرەدى. ءسويتىپ شىمكەنتتەگى جوعارى وقۋ ورنىنا گرانت نەگىزىندە وقۋعا ءتۇسىپ، ستۋدەت كەزىندە كوپتەگەن ۇيىمداردىڭ جۇمىستارىنا اتسالىسادى.
«ستۋدەنت بولىپ ءجۇرىپ دوستارىمىزبەن كەزدەسكەن كەزدە تانىس قۇربىم ءوزىنىڭ ەرىكتىلەر قاتارىندا ەكەنىن ايتىپ، جۇمىستارى جايلى اڭىمەلەپ بەردى. سودان مەندە دە قىزىعۋشىلىق پايدا بولىپ، ەرىكتىلەردىڭ قاتارىنا قوسىلعىم كەلەتىنىن جەتكىزدىم. «شەكسىزدىك» اتتى ەرىكتىلەر ۇيىمىندا ءجۇرىپ، ءبىرقاتار قوعامدىق جۇمىستارعا اتسالىستىق. 2019-جىلدان كەيىن بۇل ۇيىم جابىلىپ، مەن كەيىننەن «ASAA» ۇيىمىنا «جەڭىس» جوباسىنىڭ جۇمىسى بويىنشا كومەك كورسەتە باستادىم. وزگە ەرىكتىلەرىمەن بىرگە مۇمكىندىگى شەكتەۋلى بالالارعا ارنالعان «مەيىرىمدى جان» اكسياسىن وتكىزدىك»، - دەيدى شەر مۋحامماد حاليدا.
حاليدا مەن وزگە جاستار اكتسيا اياسىندا بالالاردى وڭالتۋ ورتالىقتارىنا بارىپ، مەرەكەلىك شارالار ۇيىمداستىرعان. تاعدىر تاۋقىمەتىن تارتىپ جۇرگەن بالالارعا قۋانىش سىيلاپ قايتقان. ال، اعىمداعى جىلدىڭ اقپان ايىندا ۆولونتەرلار جىلى مەن فرونت-وفيسىنىڭ اشىلۋىنا وراي ۇيىمداستىرىلعان فورۋمعا شىمكەنت قالاسىنىڭ ەرىكتىلەرىمەن بىرگە قاتىسىپ، UNICEF ب ا ب ق «Be Kind» جوباسىنىڭ ارنايى كۋرسىنا قاتىسقان. ءسويتىپ مامىر ايىنان باستاپ مەكتەپ وقۋشىلارى مەن اتا-انالارعا قاجەتتى سەمينار-ترەنينگتەر وتكىزگەن.
«مەيىرىمدى بول» جوباسى ماعان جاڭا الەمدى اشۋعا شىنىمەن كومەكتەستى. بالالار الەمى وقۋشىلارمەن جۇمىس جاساۋ جانە وقۋ بارىسىندا جاس وسپىرىمدەرمەن سويلەسۋ داعدىسىن مەڭگەردىم. قازىر مەن ولارمەن سويلەسىپ، ەشبىر قيىندىقسىز ءتىل تابىسا الامىن. بۇل ترەنينگتەر اتا-انالارعا دا وتە پايدالى بولدى. بارلىق اتا-انالار ءبىزدىڭ تالىمگەرلەرىمىزگە، كوپ اقپاراتتار بەرگەنى ءۇشىن يۋنيسەفكە العىستارن ءبىلدىردى. ال، ەلىمىزدە كارانتيندىك شەكتەۋلەر ەنگىزىلگەن كەزدە مەن «ىزگىلىكتە جارىسايىق» ق ق ق- نا توتەنشە جاعدايعا وراي اشىلعان «Call سەنتردە» وپەراتورلىق قىزمەتىن اتقاردىم. كارانتيندىك ۋاقىتتا 5000 نان استام مۇقتاج وتباسىلارعا ازىق-تۇلىك ۇلەستىرۋگە اتسالىسىپ، ماقتارالىندا ورىن العان توتەنشە جاعدايعا بايلانىستى ادامدارعا كومەك رەتىندە كيىم-كەشەكتەر مەن ازىق-تۇلىكتەر جەتكىزىپ بەردىك. وسى جىلدىڭ تامىز ايىندا «مەكتەپكە جول» اكتسياسى اياسىندا مۇقتاج وتباسىلاردىڭ بالالارىن وقۋ قۇرالدارىمەن قامتاماسىز ەتتىك»، - دەيدى شەر مۋحامماد حاليدا.
قازىرگى تاڭدا «ىزگىلىكتە جارىسايىق» قوعامدىق قايىرىمدىلىق قورىنىڭ باسپا ءسوز حاتشىسى قىزمەتىن اتقاراتىن بويجەتكەن ءبىرقاتار الەۋمەتتىك جوبالاردىڭ جۇزەگە اسىرىلۋى بارىسىندا اتسالىسىپ ءجۇر.
اتا-اناسىنىڭ قامقورلىعىنسىز قالعان بالالارعا تەگىن اعىلشىن ءتىلىن ۇيرەتىپ، از قامتىلعان وتباسىلاردىڭ بالالارى ءۇشىن سپورتتىق ءىس-شارالار ۇيىمداستىرىپ وتىرادى. جەتكىنشەكتەردىڭ كىتاپقا قىزىعۋشىلىعىن ارتتىرىپ، تۇرمىس جاعدايى تومەن انالار مەن ەرىكتىلەردى جاڭا داعدىلارعا ۇيرەتەدى.
سونىمەن قاتار، «كيىم كەشەك» پەن «ەرەكشە جاندارعا كومەك»، «توتەنشە جاعداي» مەن «قايىرىمدىلىق»، «نان تاراتۋ» مەن «ۇيىمداستىرۋشىلىق ەستافەتا»، «ءۇش جاقسىلىق» پەن «شاڭىراق» جوبالارى دا قالا تۇرعىندارىنىڭ الەۋمەتتىك جاعدايلارىن جاقسارتۋ ءۇشىن باعىتتالعان.
«قوردىڭ ەرىكتىلەرمەن بىرگە «ەكو-سانا» قوزعالىسىنا قاتىسىپ، جۇلدەلى 1-ورىندى جەڭىپ الدىق. بىزگە 10 ۆەلوسيپەد تارتۋ ەتكەن بولاتىن. ءوزارا اقىلداسا وتىرىپ، 8 ۆەلوسيپەدتى مۇقتاج وتباسىلارىنىڭ بالالارىنا سىيعا تارتتىق. قالعان ەكەۋىن ەرىكتىلەرىمىزگە قالدىردىق. قازىرگى تاڭدا، ەرىكتىلەر مەكتەبىندە 130 دان استام جاستارمەن جۇمىس جاساپ كەلەمىز. الداعى ۋاقىتتا قوعامنىڭ يگىلىگى ءۇشىن ۇلكەن ماڭىزدى ىستەر اتقاراتىنىمىزعا نىق سەنىمدىمىز»، - دەيدى شەر مۋحامماد حاليدا.