پوليتسيا قىزمەتكەرلەرى قارجىلىق قيىندىققا تاپ بولعان سوڭ الاياقتىقپەن اقشا تابۋدى كوزدەگەن ايەلدىڭ ارەكەتىن اشكەرەلەدى.
«الاياق ايەل nstagrami -دا سەرەبرالدى سال اۋرۋىنا شالدىققان ءۇش جاسار ءسابيدى ەمدەۋگە قاراجات جيناۋ تۋرالى بەرىلىپ، كەيىن الىنىپ تاستالعان حابارلاندىرۋدى كورگەن. ءوزىنىڭ ارام ويىن ىسكە اسىرۋ ءۇشىن الدىمەن الەۋمەتتىك جەلىدە جەكە پاراعىن اشقان. وعان ناۋقاس بالانىڭ فوتوسۋرەتىن جانە ءوزىنىڭ بانكتىك دەرەكتەرىن كورسەتىپ، كومەك سۇراعان جازباسىن جاريالايدى. جالعان حابارلاندىرۋدى كەزدەيسوق كورىپ قالعان بالانىڭ اناسى پوليتسياعا ارىزداندى»، - دەيدى وبلىستىق پوليتسيا دەپارتامەنتى باستىعى قامزا ۇمبەتقاليەۆ.
اتىراۋ قالالىق پوليتسيا باسقارماسى №1 پوليتسيا ءبولىمىنىڭ قىزمەتكەرلەرى جالعان حابارلاندىرۋ اۆتورىن ۇستادى. ول اتىراۋ قالاسىنىڭ 28 جاستاعى تۇرعىنى بولىپ شىقتى.
«ول 40 مىڭ تەڭگە قارىزىن وتەۋ ءۇشىن وسىلاي ارەكەت ەتپەك بولعان. 16-23 - قاراشادا ونىڭ ەسەپشوتىنا سىرقات بالاعا كومەك قولىن سوزعان ازاماتتاردان 37 مىڭ تەڭگە تۇسكەنى انىقتالدى. سوتقا دەيىنگى تەرگەۋ كەزىندە كۇدىكتى ازاماتشا اتالعان قارجىنى سىرقات بالانىڭ اناسىنا بەردى» - دەيدى دەپارتامەنت باستىعى قامزا ۇمبەتقاليەۆ.
قازىر ق ر قىلمىستىق كودەكستىڭ 190-بابىمەن (الاياقتىق) سوتقا دەيىنگى تەرگەۋ ءجۇرىپ جاتىر.