شىمكەنتتە بادام وزەنىنىڭ ۇستىنەن وتەتىن كوپىر پايدالانۋعا بەرىلدى
ا-2 «قورعاس- الماتى- شىمكەنت- وزبەكستان رەسپۋبليكاسىنىڭ شەكاراسى» اۆتوموبيل جولىن قايتا قۇرۋ جۇمىستارى تولىعىمەن اياقتالدى.
قالا اكىمى مۇرات ايتەنوۆ قۇرىلىسى اياقتالعان كوپىردىڭ اشىلۋ راسىمىنە قاتىستى. قولدانىستاعى بۇل كوپىر 1970 -جىلدارى سالىنعان. ۇزىندىعى 144 مەتر، ەنى 11 مەتردى قۇرايتىن. 2005 -جىلى كوپىردىڭ تەحنيكالىق جاعدايى اپاتتى دەپ تانىلدى. 2016 -جىلى اتالعان رەسپۋبليكالىق ماڭىزى بار اۆتوموبيل جولى شىمكەنت قالاسىنىڭ تەڭگەرىمىنە قابىلدانىپ، 31,6 شاقىرىم جولدى قايتا قۇرۋ جۇمىستارىنا جوبالىق- سمەتالىق جۇمىستار (7 كەزەڭ) ازىرلەنە باستالدى. قازىرگى تاڭدا ەكىنشى كەزەڭگە سايكەس جۇمىستار جۇرگىزىلۋدە. ال، 1-كەزەڭدە كورسەتىلگەن كوپىر پايدالانۋعا بەرىلدى. كوپىر قۇرىلىسى ءۇش كەزەڭ بويىنشا جۇرگىزىلىپ، 1148 شاقىرىم جول جوندەلدى.
قايتا قۇرۋ جۇمىستارىنىڭ ەسەبىنەن، اپاتتى كوپىردىڭ ورنىنا جاڭا كوپىر سالىنىپ، ەنى 22 مەترگە ۇلعايدى. ناتيجەسىندە كولىك وتكىزۋ قابىلەتى 2 ەسەگە ارتتى. قۇرىلىس جۇمىستارىن «ج ب ي- س» ج ش س جۇرگىزدى.