كەلەس اۋداندىق پوليتسيا بولىمىنە حابارلاسقان جەرگىلىكتى تۇرعىن، ۇيىنە قىدىرىپ كەلگەن تۇرمىستاعى قىزىنىڭ ءىز-ءتۇزسىز جوعالعانىن ايتقان. العاشقىدا جاقىندارى مەن اتا-ەنەسى ىزدەپ، ارەكەتتەنگەن. ناتيجە شىقپاعاننان سوڭ، پوليتسيا قىزمەتكەرلەرىنىڭ كومەگىنە جۇگىنۋگە ءماجبۇر بولعان. اتالعان جايتتى كەلەستىك پوليتسەيلەر بىردەن تىركەۋگە الىپ، جوعالعان كەلىنشەكتى ىزدەستىرە باستايدى. ىزدەستىرۋ جۇمىستارىنا ۋچاسكەلىك پوليتسەيلەر مەن جەدەل ۋاكىلدەر جۇمىلدىرىلدى. ولار ايەل تۋرالى تاكسي جۇرگىزۋشىلەرىنەن، كورىپ نەمەسە ءبىلۋى مۇمكىن دەگەن ادامداردان سۇراستىرا باستاعان.
«ناتيجەسىندە پوليتسەيلەر بەينەكامەرا ارقىلى كەلىنشەكتىڭ اۆتوكولىككە وتىرىپ، شىمكەنت قالاسىنا قاراي كەتكەنىن انىقتادى. ءبىر تاۋلىك ىشىندە ءىز-ءتۇزسىز كەتكەن جاس ايەل مەگوپوليستە قىدىرىپ جۇرگەن جەرىنەن تابىلىپ، جاقىندارىنا جەتكىزىلدى. تەرگەۋ بارىسىندا انىقتالعانداي، نەبارى 6 اي بۇرىن وتاۋ تىككەن ەرلى-زايىپتىلاردىڭ اراسىندا ءوزارا كيكىلجىڭ بولعان. سونىڭ سالدارىنان اشۋعا بوي الدىرعان كەلىنشەك ەشكىمگە ايتپاستان ۇيىنەن بەلگىسىز باعىتقا شىعىپ كەتكەن. بۇگىنگى تاڭدا ارنايى ماماندارمەن ءتۇسىندىرۋ جۇمىستارى جۇرگىزىلىپ، ول ۇيىنە قايتارىلدى»، - دەلىنگەن اقپاراتتا.