جۋرناليستيكا سالاسىنداعى «شاڭىراق» شىعارماشىلىق كونكۋرسى قازاقستان حالقى اسسامبلەياسىنىڭ دامۋ تۇجىرىمداماسىن ىسكە اسىرۋ شەڭبەرىندە جۇزەگە استى. كونكۋرس قازاقستاندىق جۋرناليستيكانىڭ دامۋىنا قوعامدىق كەلىسىم مەن جالپىۇلتتىق بىرلىك تاقىرىبىندا ماتەريالدار جاريالايتىن جۋرناليستەردى ىنتالاندىرۋ ارقىلى ىقپال ەتۋ ماقساتىندا ۇيىمداستىرىلدى.
بيىلعى جىلى كونكۋرسقا 40 جۋرناليست ماتەريالدارىن ۇسىندى. بايقاۋ جەڭىمپازدارىن قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى جانسەيىت تۇيمەبايەۆ قۇتتىقتادى.
- ءبىرىنشى ورىندى «قازاق ءۇنى» گازەتىنىڭ باس رەداكتورى يسا قازبەك جەڭىپ الدى؛
- ەكىنشى ورىن «Kazakһ–TV « ارناسىنىڭ ءتىلشىسى جەڭىس باعىت ۇلى الدى؛
- ءۇشىنشى ورىن «قازاق گازەتتەرى» سايتىنىڭ رەداكتورى بەرىك بەيسەن ۇلى يەلەندى. ارنايى جۇلدەنى «قازاقپارات» ح ا ا جەڭىپ الدى.
«مەن ۇلكەن ريزاشىلىعىمدى بىلدىرەمىن. ءبىزدىڭ اگەنتتىك قازاقستان حالقى اسسامبلەياسىنىڭ ءىس-شارالارىن ءاردايىم قولداپ كەلەدى. بيىل «قازاقپارات» حالىقارالىق اقپارات اگەنتتىگى ءوزىنىڭ 100 جىلدىق مەرەيتويىن اتاپ ءوتتى. ءبىز قوعامدىق كەلىسىم مەن ۇلت بىرلىگىن ساقتاۋ ماقساتىندا اسسامبلەيامەن بىرلەسىپ جۇمىسىمىزدى جالعاستىرامىز»، - دەدى «قازاقپارات» ح ا ا باسقارما ءتوراعاسى اسقار وماروۆ.