«قىلمىستىق-اتقارۋ جۇيەسى مەكەمەلەرىن ۆيدەوباقىلاۋمەن تولىق قامتۋ ءۇشىن نورماعا سايكەس 231 جۇيەنى الۋ قاجەت. قازىرگى كەزدە 71 بەينەباقىلاۋ جۇيەسى (31 پايىز) بار، ونىڭ ىشىندە بيىل التاۋى ساتىپ الىندى» دەلىنگەن اسقار ماميننىڭ سەناتورلاردىڭ دەپۋتاتتىق ساۋالىنا بەرگەن جاۋابىندا.
سونىمەن قاتار ول اتالعان ماسەلە بويىنشا ىسكە اسىرىلاتىن جوسپارعا توقتالدى.
«ق ر ىشكى ىستەر مينيسترلىگىنىڭ قىلمىستىق- اتقارۋ جۇيەسى مەكەمەلەرىنە جاپپاي بەينەباقىلاۋ ەنگىزۋ بويىنشا مەملەكەت باسشىسىنىڭ تاپسىرماسىن ورىنداۋ اياسىندا ءتيىستى ەسەپ-قيساپ الدىن الا جۇرگىزىلدى. ونى 2021-2023-جىلدارعا ارنالعان رەسپۋبليكالىق بيۋجەتتى ناقتىلاۋ اياسىندا قاراستىرۋ ەسكەرىلگەن»، - دەيدى پرەمەر-مينيستر.
سونىمەن قاتار ءى ءى م بيۋجەتىنە جۇكتەمەنى ازايتۋ ماقساتىندا الەۋەتتى ينۆەستورلارمەن بىرلەسە مەملەكەتتىك-جەكەمەنشىك سەرىكتەستىك اياسىندا بەينەباقىلاۋدى ەنگىزۋ پىسىقتالىپ جاتىر.
ەسكە سالا كەتەيىك، بيىلعى جولداۋدا مەملەكەت باسشىسى پەنيتەنتسيارلىق مەكەمەلەردە، پوليتسەيلەردىڭ قىزمەتتىك بولمەلەرىندە تۇتاستاي بەينەباقىلاۋ ەنگىزۋدى تاپسىردى.