كوروناۆيرۋسقا قارسى ۆاكتسينا مۇناي نارىعىن جانداندىرادى - نۇرلان نوعايەۆ

نۇر- سۇلتان. قازاقپارات - كوروناۆيرۋسقا قارسى ۆاكتسينانىڭ ازىرلەنۋى مۇناي- گاز نارىعىن جانداندىرۋعا مۇمكىندىك بەرەدى.

بۇل تۋرالى ق ر ەنەرگەتيكا ءمينيسترى نۇرلان نوعايەۆ ءمالىم ەتتى، دەپ حابارلايدى قازاقپارات ءتىلشىسى.

«مۇناي- گاز سالاسى ءتۇرلى وزگەرىستەرگە وتە سەزىمتال ەكەنى بەلگىلى. مۇناي مەن گاز - بيرجالىق تاۋارلار. سوندىقتان الەمدە بولىپ جاتقان وزگەرىستەر باعاعا ىقپال ەتىپ وتىر. جالپى دامۋعا، ەكونوميكاعا اسەر ەتەتىن كەز كەلگەن وقيعا مەن ساياسي فاكتورلار مۇناي باعاسىنا اسەرىن تيگىزەدى»، - دەدى مينيستر ورتالىق كوممۋنيكاتسيالار قىزمەتىندە.

وسى ورايدا ول ءىرى مەملەكەتتەر باسشىلارىنىڭ مالىمدەمەلەرى نەمەسە قانداي دا ءبىر ەلەۋلى شەشىمدەر باعانىڭ قالىپتاسۋىنا وزگەرىس ەنگىزەتىنىن اتاپ ءوتتى.

«بيىل قازاقستان 5 ميلليون تونناعا ءوندىرۋ كولەمىن تومەندەتتى. بۇل قادام قويمالاردا ءونىمنىڭ شەكتەن تىس جينالماۋى ءۇشىن ءارى كەن ورىندارىنىڭ توقتاۋىنا جول بەرمەۋ باعىتىندا ىسكە اسىرىلدى. اتاپ ايتقاندا، وسىنىڭ بارلىعى وپەك كەلىسىم اياسىندا قاجەتتى شارا بولدى. سالاداعى ساراپشىلار كوروناۆيرۋسقا قارسى ۆاكتسينانى دايارلاۋ جاقسى ناتيجە بەرىپ، ەكونوميكالىق دامۋ جانداناتىنىن ايتۋدا»، - دەدى ن. نوعايەۆ.