ەربولات دوسايەۆ مۇنايعا سۇرانىس جونىندە پىكىر ءبىلدىردى

نۇر-سۇلتان. قازاقپارات – ق ر ۇلتتىق بانكىنىڭ ءتوراعاسى ەربولات دوسايەۆ كوروناۆيرۋس ىندەتىنىڭ الەمدىك ەكونوميكاعا اسەرى جايىندا ايتىپ بەردى، دەپ حابارلايدى قازاقپارات ءتىلشىسى.

«2021 -جىلدىڭ ورتاسىنا دەيىن پاندەميانى تەجەۋ شەكتەۋلەردى ساقتاپ، قاجەت بولعان كەزدە ولاردى كۇشەيتۋ كەرەك بولادى. بۇل الەمدىك ەكونوميكانىڭ قالپىنا كەلۋىن ەداۋىر توقتاتا تۇرۋى مۇمكىن. ەكىنشىدەن، الەمدىك تاۋار نارىقتارى، اسىرەسە مۇناي نارىعى قۇبىلىپ تۇر. ەۋروپانىڭ ءبىرقاتار ءىرى ەلىندە جاڭا لوكداۋندار ەنگىزۋ مۇنايعا سۇرانىستىڭ قالپىنا كەلۋ قارقىنىنا ىقپال ەتەدى، ونىڭ ناتيجەسىندە مۇناي ءوندىرۋ قايتادان سۇرانىستان اسىپ كەتۋى مۇمكىن»، - دەدى ە. دوسايەۆ سەناتتىڭ جالپى وتىرىسىندا.

ونىڭ ايتۋىنشا، مۇناي باعاسىنىڭ قارقىنى كوپ جاعدايدا بيىلعى 30-قاراشا – 1-جەلتوقساندا وتەتىن وپەك+-تىڭ مينيسترلىك كەزدەسۋىنىڭ قورىتىندىسىنا بايلانىستى بولادى، وندا 2021 -جىلى مۇناي ءوندىرۋ كۆوتالارى تۋرالى شەشىم قابىلدانادى.

«ۇشىنشىدەن، الەم ەكونوميكاسىنىڭ قالپىنا كەلۋى ساۋدا شەكتەۋلەرىن الۋعا جانە جەتكىزۋ تىزبەگىن قالپىنا كەلتىرۋگە بايلانىستى بولادى. ازيا- تىنىق مۇحيت وڭىرىندە قىتاي مەن ۇلەسىنە الەمدىك ەكونوميكانىڭ 29 پايىزى تيەسىلى 14 ەلدىڭ اراسىندا الەمدەگى ەڭ ءىرى ەركىن ساۋدا ايماعىن قۇرۋ وڭ بەلگى بولدى. جاڭا كەلىسىم الەمدىك ەكونوميكانىڭ قالپىنا كەلۋ قارقىنىنا وڭ اسەر ەتۋى مۇمكىن»، - دەدى ۇ ب باسشىسى.

ونىڭ سوزىنە قاراعاندا، وسى جاعدايلاردا الەمدىك ەكونوميكانىڭ قالپىنا كەلۋى 2021 -جىلدان باستالادى، ءبىرىنشى بولىپ داعدارىستان دامىعان ەلدەر شىعا باستايدى.

حالىقارالىق ۆاليۋتا قورىنىڭ (ح ۆ ق) بولجامى بويىنشا تومەن بازانىڭ اياسىندا الەمدىك ەكونوميكانىڭ ءوسۋى 2021 -جىلى 5,2 پايىزعا جەتىپ، ورتا مەرزىمدى پەرسپەكتيۆادا 3,5 پايىزعا دەيىن بىرتىندەپ باياۋلايدى.