قازاقستاندىق ارۋ اۋىر اتلەتيكادان الەم كۋبوگىنىڭ جەڭىمپازى اتاندى

نۇر-سۇلتان. قازاقپارات - ايسامال سانسىزبايەۆا اۋىر اتلەتيكادان ونلاين الەم كۋبوگىنىڭ جەڭىمپازى اتاندى، دەپ حابارلايدى قازاقپارات Olympic.kz سايتىنا سىلتەمە جاساپ.

پەرۋدىڭ ليما قالاسىندا پەرۋ اۋىر اتلەتيكا فەدەراتسياسىنىڭ ۇيىمداستىرۋىمەن ونلاين الەم كۋبوگى ءوتىپ جاتىر.

جارىستا قىزدار اراسىندا 81 كەلىدەن جوعارى سالماقتا قازاقستاندىق سپورتشى ۇزدىك دەپ تانىلدى.

ايسامال سانسىزبايەۆا قوسسايىس ناتيجەسى بويىنشا 244 كەلىنى كوتەرىپ، قازاقستان قورجىنىنا تاعى ءبىر «التىن» سالدى.

جاستار اراسىندا العاشقى جارىسقا قاتىسقان تاعى ءبىر قازاقستاندىق ءجانالي تۇياقوۆ ءۇشىنشى ورىندى جەڭىپ الدى.

ول ۇلدار اراسىندا 102 كەلىدەن جوعارى سالماق دارەجەسىندە باق سىناپ، قوسسايىس ناتيجەسى بويىنشا 319 (140+179) كەلىنى كوتەردى.

وسىلايشا، قازاقستان قورجىنى تاعى ءبىر التىن، ءبىر قولا جۇلدەمەن تولىقتى. وسىعان دەيىن ابىلاي اۋەلحانوۆ پەن راحات بەكبولات التىن السا، گۇلنۇر ىبىراي قولا جۇلدەگە قول جەتكىزگەن بولاتىن.