ش ق و سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ مىندەتىن اتقارۋشى تالعات تۇڭعىشبايەۆتىڭ ايتۋىنشا، وبلىس كوروناۆيرۋس ينفەكتسياسىنىڭ ەپيدەميولوگيالىق جاعدايى بويىنشا «قىزىل ايماققا» كىرەدى. 17-قاراشادا ءبىر تاۋلىك ىشىندە قاۋىپتى دەرتكە شالدىققان 230 ادام تىركەلدى.
«كوپشىلىك اراسىندا «ايماقتا جۇقپالى اۋرۋدىڭ وسىنشاما تەز تاراۋىنا نە سەبەپ؟» دەگەن سۇراق تۋىنداۋدا. نەگىزىنەن وسىنداي احۋال كۇتىلگەن. سەبەبى شىعىس قازاقستاندا كوروناۆيرۋستىڭ ءبىرىنشى تولقىنىندا ەپيدەميولوگيالىق جاعداي باقىلاۋدا بولدى. ال قازىر ينفەكتسيا حالىق اراسىندا جاپپاي تارالىپ جاتىر»، - دەدى تالعات تۇڭعىشبايەۆ.
ونىڭ ايتۋىنشا، ءبىرىنشى كەزەكتە ءوڭىردىڭ كليماتىن، گەوگرافيالىق ورنىن ەسكەرۋ كەرەك. COVID-2019 ينفەكتسياسى تۇماۋ سياقتى، ءدال وسى كەزەڭدە تەز تارالا باستايدى.
«ەكىنشىدەن، شىعىس قازاقستاندا ىندەتتىڭ ورشۋىنە وبلىس تۇرعىندارى مەن كاسىپكەرلىك سۋبەكتىلەرىنىڭ ەپيدەمياعا قارسى شەكتەۋدى ساقتاماۋى سەبەپ بولدى. ۇشىنشىدەن، حالىقتىڭ بەلسەندى كوشى- قونى. وسى رەتتە ايتا كەتۋ كەرەك، كورشى مەملەكەتتەردىڭ شەكارالاس ايماقتارىندا ۆيرۋس جۇقتىرعارداردىڭ كۇرت ءوسۋى بايقالادى»، - دەدى دەپارتامەنت باسشىسىنىڭ مىندەتىن اتقارۋشى.