مۇنداي ورتالىقتاردىڭ اشىلۋى جۇمىستى جۇيەلەندىرۋگە جانە «ءبىر تەرەزە» قاعيداتى بويىنشا قىزمەت كورسەتۋگە مۇمكىندىك بەرەدى.
بۇل تۋرالى نۇر-سۇلتان قالاسىنىڭ اكىمى التاي كولگىنوۆ Instagram-پاراقشاسىندا جازدى، دەپ حابارلايدى قازاقپارات.
«نۇر-سۇلتاندا تۇرعىن ءۇي سالاسىندا قىزمەت كورسەتەتىن ءبىرىڭعاي ورتالىق اشىلدى! (رەسپۋبليكا داڭعىلى، 32). بۇل ورتالىقتا تۇرعىن ۇيگە كەزەككە تۇرۋ، كەزەك ءنومىرىن تەكسەرۋ، تۇرعىن ءۇي باعدارلامالارىنا قاتىسۋ، تۇرعىن ءۇي سەرتيفيكاتىن الۋ، كرەديتتىك/جالعا بەرىلەتىن پاتەرلەر بويىنشا جانە تاعى دا باسقا ماسەلەلەرگە قاتىستى كەڭەس الۋعا بولادى. بۇل ورتالىق قالا تۇرعىندارى ءۇشىن ىڭعايلى. سەبەبى ولار تۇرعىن ءۇي ماسەلەلەرى بويىنشا قالانىڭ ءار اۋدانىندا ورنالاسقان ينستانسيالارعا بارماي-اق ءبىر جەردەن كەڭەس الا الادى»، - دەپ جازدى ا. كولگىنوۆ.
سونداي-اق ورتالىقتا «تۇرعىن ءۇي قۇرىلىس جيناق بانكىنىڭ» كەڭەسشىلەرى دە جۇمىس اتقارادى. بولىنگەن اۋماقتىڭ جالپى اۋدانى 2 مىڭ شارشى مەتردەن اسادى. كۇن سايىن ورتالىق 300 دەن استام قالا تۇرعىنىن قابىلدايدى.
«مەملەكەت باسشىسىنىڭ تاپسىرماسىنا سايكەس بيىل قولجەتىمدى الەۋمەتتىك تۇرعىن ءۇي قۇرىلىسىنىڭ كولەمى ءۇش ەسە ارتتى. مۇنداي ورتالىقتاردىڭ اشىلۋى جۇمىستى جۇيەلەندىرۋگە جانە «ءبىر تەرەزە» قاعيداتى بويىنشا قىزمەت كورسەتۋگە مۇمكىندىك بەرەدى. وتكەن جىلدىڭ جازىندا «جانۇيا» وتباسى ينستيتۋتىن قولداۋ ورتالىعى اشىلدى، وندا ماماندار قالا تۇرعىندارىنا الەۋمەتتىك ماسەلەلەر بويىنشا كەڭەس بەرەدى. وسى ۋاقىت ىشىندە ورتالىققا 40 مىڭعا جۋىق ادام جۇگىنىپ، كومەك الدى»، - دەدى ەلوردا اكىمى.