«قىستىگۇنى ءمىنسىز جۇرەتىندەي كولىكتى دايىنداپ العان ءجون. البەتتە، ەڭ ءبىرىنشى كەزەكتە جازدىق دوڭگەلەكتى قىستىق دوڭگەلەككە اۋىستىرساڭىز، ول جولدا قاۋىپسىزدىكتىڭ ساقتالىپ، اۆتوكولىكتىڭ قوزعالىس وتىمدىلىگىن ارتتىرۋعا سەپ بولادى. دوڭگەلەكتىڭ «تىكەنەكتى» نەمەسە «ۇيكەلىستى» ءتۇرىن ناقتى ايماقتىڭ ەرەكشەلىگىنە بايلانىستى تاڭداپ الۋ كەرەك. سونىمەن قاتار ءدال قازىر كولىكتىڭ جىلىتۋ جۇيەسىنىڭ، سىرتقا جارىق ءتۇسىرۋ قۇرىلعىلارىنىڭ، تەرەزە تازارتقىشىنىڭ دۇرىستىعىن تەكسەرىپ، اككۋمۋلياتور باتارەياسىن اۋىستىرعان ابزال»، - دەدى ءى ءى م باسپا ءسوز ءماسليحاتىندا سەرىك ءتۇسىپوۆ.
ونىڭ ايتۋىنشا، كولىك قىزمەتىنىڭ اقاۋسىز بولۋى قوزعالىستىڭ جايلىلىعى مەن قاۋىپسىزدىگىن قامتاماسىز ەتىپ، جول ۇستىندەگى ءقاۋىپتى سەيىلتەدى.
«ديزەلدى وتىنمەن جۇرەتىن، جولاۋشىلاردى نەمەسە جۇكتەردى تاسيتىن اۆتوكولىكتەرگە جەكە توقتالسام دەيمىن: ايازدى كۇنى ورتا جولدا قالماس ءۇشىن جىل مەزگىلىنە ساي ساپالى سولياركا قۇيعان دۇرىس. قىس باستالىسىمەن قۇتقارۋشىلار ايدالادا كولىگى توقتاپ قالعان جۇرگىزۋشىلەردى قۇتقارۋمەن بولادى، ويتكەنى ولار قىسقا ارنالعان سولياركانىڭ ورنىنا جازدىعىن قۇيادى. وسىدان بارىپ ول قاتىپ قالادى دا كولىك ارى قاراي جۇرە المايدى»، - دەيدى ول.
سەرىك ءتۇسىپوۆ جۇك كولىكتەرىنىڭ سىرعىپ كەتۋىنە جول بەرمەيتىن ارنايى قۇرىلعى بولۋى كەرەكتىگىن دە ەسكەرتتى. ونى جۇك كولىگىنىڭ جۇرگىزۋشىلەرى ۇزاق ۋاقىتقا ءبىر ورىندا، اسىرەسە تاۋلى جەردە توقتاعان كەزدە پايدالانادى.
اۆتور: ايان بەكەن ۇلى