اسىرەسە الپاۋىت ا ق ش پەن ەۋروپا ەلدەرىندە كارانتيندىك شارالار بارىنشا كۇشەيتىلگەنمەن، ينفەكتسيانىڭ تارالۋىن توقتاتۋ مۇمكىن بولماي تۇر. قاۋىپتى ىندەتتىڭ ەكىنشى تولقىنى ەكپىنىن ءازىر تومەندەتپەيتىن سىڭايلى. ونى تومەندەگى شولۋدىڭ دەرەكتەرىنەن بايقاۋعا بولادى.
قىتايدىڭ كەيبىر وڭىرلەرىندە كوروناۆيرۋس ىندەتى كۇشەيىپ كەتۋى مۇمكىن. بۇل تۋرالى ەلدىڭ دەنساۋلىق ساقتاۋ ىستەرى جونىندە مەملەكەتتىك كوميتەت باسشىسى حابارلادى.
قىتاي بيلىگى ىندەتتىڭ الدىن الۋ شارالارىنا كۇش سالۋعا كىرىستى. كوروناۆيرۋس تەستىنەن وتكىزۋ اۋقىمىن كەڭەيتپەك. وندا دەرتتى جۇقتىرۋ قاۋپى جوعارى حالىقتىڭ 8 توبى بەلگىلەنگەن.
بۇل تىزىمگە اۋرۋحانالار مەن ءدارىحانالار، اۋىل شارۋاشىلىعى ونىمدەرى ساتىلاتىن بازارلار قىزمەتكەرلەرى جانە مۇزداتىلعان ونىمدەرمەن اينالىساتىن ادامدار قوسىلدى.
ەڭ الدىمەن سولاردى تەكسەرەدى. وعان قوسا شەتەلدەن اكەلىنەتىن مۇزداتىلعان ونىمدەردىڭ ۇلگىلەرى ۇنەمى ساراپتامادان وتەتىن بولدى.
ا ق ش- تا كوروناۆيرۋستى جۇقتىرعاندار سانى وسكەن. كەيبىر شتاتتاردا شەكتەۋلەر كۇشەيتىلدى. ورەگون مەن نيۋ-مەكسيكادا تۇرمىسقا قاجەتتى تاۋارلاردى وندىرمەيتىن جانە ساتپايتىن كومپانيالاردىڭ جۇمىسى توقتاتىلماق.
ال سولتۇستىك داكوتادا ىندەتتىڭ كۇشەيۋىنە بايلانىستى بەتپەردە تاعىپ ءجۇرۋ ءتارتىبى قايتا ەنگىزىلدى.
جاڭا تالاپقا ساي تۇرعىندار جابىق قوعامدىق ورىندارمەن بىرگە كوشەدە اراقاشىقتىقتى ساقتاۋ مۇمكىن بولماسا ماسكا تاعۋى مىندەتتى.
بۇگىنگى تاڭدا ا ق ش- تا ۆيرۋستى جۇقتىرعاندار سانى 11 ميلليونعا جۋىقتاپتى. دەرتتەن 245 مىڭنان اسا ناۋقاس قايتىس بولعان.
اۆستريادا كوروناۆيرۋستى جۇقتىرعاندار سانىنىڭ كوبەيۋىنە بايلانىستى قايتادان قاتاڭ كارانتين ەنگىزىلەدى. بۇل تۋرالى وسى ەلدىڭ كانتسلەرى سەباستيان كۋرتس مالىمدەدى.
شارا كەلەسى اپتانىڭ سەيسەنبىسىنەن باستاپ جەلتوقساننىڭ التىسىنا دەيىن جالعاسادى. جاڭا تارتىپكە ساي ەلدەگى بارلىق مەكتەپتەر قاشىقتان وقۋعا كوشىپ، بالاباقشالار جابىلادى. ازىق-تۇلىك دۇكەندەرى مەن ءدارىحانالاردان باسقا ساۋدا ورىندارى جۇمىستارىن توقتاتادى.
ءدامحانالار مەن بارلار تاعامدى تەك جەتكىزىپ بەرۋ بويىنشا قىزمەت كورسەتەدى. ال تۇرعىندار ۇيلەرىنەن تەك جۇمىسقا بارۋ، تۋىستارىنا كومەكتەسۋ جانە تازا اۋادا سەرۋەندەۋ ءۇشىن عانا شىعا الادى.
گەرمانيادا ءبىر تاۋلىكتە 23542 ادام كوروناۆيرۋس جۇقتىرعان. بۇل ەلدە لوكداۋن رەجيمى ەنگىزىلگەن بولاتىن. وسىعان بايلانىستى مەيرامحانالار، فيتنەس ورتالىقتارى، مۇراجايلار مەن كينوتەاترلار جابىق. سوعان قاراماستان، ۆيرۋس جۇقتىرۋ دەرەكتەرى ارتىپ جاتقان كورىنەدى. ونىڭ ىشىندە قارتتار ءۇيى مەن مەكتەپتەردە دە بار.
ال زەرتحانالار ادامداردى تەستتەن وتكىزىپ ۇلگەرمەي جاتىر. وسىعان بايلانىستى برەمەن قالاسىنداعى مەكەمەلەر كوروناۆيرۋسپەن اۋىرعان ناۋقاستارمەن تىكەلەي بايلانىستا بولعان ازاماتتاردى تەكسەرۋدى توقتاتقان. تەست تەك دەنساۋلىعى ناشارلاعان تۇرعىندارعا عانا تاعايىندالۋدا. مۇنداي شارا زەرتحانالارعا تۇسكەن جۇكتەمەنى ازايتۋ ءۇشىن جاسالىپ وتىر ەكەن.
گەرمانيا بيلىگى ەلدەگى ناۋقاستاردىڭ ارتۋىنا قاراماستان، ءالى دە بەلگيا مەن فرانسيادان كەلگەن ناۋقاستاردى قابىلداپ جاتىر. فرانسيادا قاۋىپتى ىندەتكە شالدىققانداردىڭ سانى ازايماي تۇر. ناۋقاستاردىڭ كوپتىگىنەن اۋرۋحانالاردا ورىن جوق. وسىعان بايلانىستى ۆيرۋس جۇقتىرعان ازاماتتار ستراسبۋرگتەگى ەمحانالارعا كوشىرىلىپ جاتىر.
ىندەتتىڭ العاشقى تولقىنى كەزىندە ەڭ كوپ زارداپ شەككەن وسى قالا ەدى. ناۋقاستاردىڭ كوپتىگىنەن ولار كەرىسىنشە ستراسبۋرگتەن وزگە وڭىرلەرگە جىبەرىلگەن بولاتىن. ءتىپتى شۆەيتسارياعا، ليۋكسەمبۋرگكە جانە گەرمانياعا تاسىمالدانعان ەدى. قازىرگى جاعداي مۇلدەم باسقاشا بولىپ تۇر.
ايتا كەتەيىك، بۇگىنگە دەيىن فرانسيادا 890 مىڭنان استام ينفەكتسياعا شالدىعۋ دەرەگى راستالعان. يسپانيا بيلىگى ەنگىزگەن شەكتەۋ شارالارىنا قاراماستان، كوروناۆيرۋسقا قاتىستى احۋال ناشار. بۇل جونىندە ەلدىڭ دەنساۋلىق ساقتاۋ مينيسترلىگى مالىمدەدى. مامانداردىڭ ايتۋىنشا، ەلدە 100 مىڭ ادامعا شاققاندا 500 ۆيرۋس جۇقتىرۋ وقيعاسى تىركەلەدى.
بۇگىندە يسپانيا كوروناۆيرۋس جۇقتىرعاندار سانى بويىنشا باتىس ەۋروپادا ەكىنشى ورىندا تۇر.
سلوۆەنيادا كوروناۆيرۋسقا بايلانىستى شەكتەۋ شارالارى كۇشەيتىلدى. ەلدىڭ دەنساۋلىق ساقتاۋ ءمينيسترى توماش گانتار وسىلاي مالىمدەدى. جاڭا تارتىپكە سايكەس ەلدە قوعامدىق كولىك قىزمەتى توقتايتىن بولادى. ومىرلىك ماڭىزى جوق كاسىپورىندار دا جابىلماق. بۇدان بولەك ادامداردىڭ توپ بولىپ جينالۋىنا تىيىم سالىنادى.
جاڭا ەرەجەلەر كەم دەگەندە ەكى اپتاعا سوزىلادى. ايتا كەتكەن ءجون، ەپيدەميا باستالعالى بەرى سلوۆەنيادا 50 مىڭنان استام ادام كوروناۆيرۋس جۇقتىرىپ، 700 گە جۋىعى كوز جۇمعان.
بەلگيادا كوروناۆيرۋستىڭ تارالۋى باسەڭدەگەنىنە قاراماستان، توتەنشە جاعدايدىڭ ءتورتىنشى دەڭگەيى ساقتالادى. كورولدىك بيلىگى كەڭەستىك كوميتەتتىڭ كەزەكتى وتىرىسىندا وسىنداي شەشىم قابىلدادى.
پرەمەر-مينيستر الەكساندر دە كروونىڭ مالىمدەۋىنشە، قازىر ەل اۋرۋحانالارىنداعى جاعداي ءارتۇرلى. ىندەت جۇقتىرعاندار سانى تومەندەپ كەلە جاتىر. ءبىراق وتكەن اپتادان بەرى جانساقتاۋ بولىمىندەگى ناۋقاستار سانى ازايماعان. رەسمي دەرەككە قاراعاندا بەلگيادا سوڭعى ەكى اپتادا كۇن سايىن ۆيرۋستى مىڭنان اسا ادام جۇقتىرىپ، 200 دەي ناۋقاس قايتىس بولعان.
يران ەلىندە دە كوروناۆيرۋستىڭ كۇشەيۋىنە بايلانىستى جاڭا شەكتەۋلەر ەنگىزىلمەك. بۇل جونىندە وسى ەلدىڭ پرەزيدەنتى حاسان رۋحاني مالىمدەدى. جوسپارعا ساي تىيىمدار ءار وكرۋگ پەن قالاداعى دەرتتى جۇقتىرۋ كورسەتكىشىنە ساي قولدانىلماق.
مىسالى، قىزىل ايماقتا قالا تۇرعىندارىنىڭ تىرشىلىگىنە اسا قاجەتتى سالادان باسقا بارلىق قىزمەت ءتۇرى توقتاتىلادى. ال سارعىلت ايماقتا ءدامحانالار مەن ۋنيۆەرسيتەتتەر جۇمىسىن جالعاستىرادى. سارى ايماقتا تەك ويىن-ساۋىق، سپورتتىق جانە ءدىني ءىس-شارالاردى وتكىزۋگە تىيىم سالىنادى.
شەكتەۋلەردى جەڭىلدەتۋ نەمەسە قاتاڭداتۋ 14 كۇننەن كەيىن ءار ايماقتاعى جاعدايعا ساي قاراستىرىلادى. ال تەگەراندا قايتا كارانتين ەنگىزىلۋى مۇمكىن. رەسمي دەرەككە سۇيەنسەك، يراندا ىندەت تارالعالى ۆيرۋستى جۇقتىرعاندار سانى 750 مىڭعا جۋىقتاپ، 40 مىڭنان اسا ناۋقاس كوز جۇمعان.
وڭتۇستىك كورەيادا ءبىر كۇندە 200 گە جۋىق كوۆيد جۇقتىرۋ دەرەگى انىقتالعان. بۇل قىركۇيەكتىڭ باسىنان بەرگى ەڭ جوعارى كورسەتكىش. ۆيرۋس جۇقتىرعانداردىڭ كوبى سەۋلدىكتەر بولىپ وتىر.
وسىدان ەكى كۇن بۇرىن وڭتۇستىك كورەيادا ماسكا رەجيمىن بۇزعاندارعا ايىپپۇل سالىنا باستادى. دەگەنمەن، 14 جاسقا دەيىنگى بالالار مەن دەنساۋلىعى ناشار تۇرعىندار قورعانىس قۇرالىن كيۋدەن بوساتىلعان. سونداي-اق 2 مەتر اراقاشىقتىقتى ساقتاعان جاعدايدا دا ماسكاسىز جۇرۋگە رۇقسات ەتىلگەن.
امەريكاندىق Pfizer كومپانياسى مەن ونىڭ نەمىس سەرىكتەسى Biontech- ءتىڭ كوروناۆيرۋسقا قارسى ازىرلەگەن ۆاكتسيناسى «Covuity» دەپ اتالۋى مۇمكىن.
بۇل تۋرالى بريتاندىق The Daily Telegraph گازەتى حابارلادى. ول كومپانيالاردىڭ ەۋروپالىق وداق پەن ا ق ش- تا تاۋارلىق بەلگىنى تىركەۋگە وتىنىشتەرىن زەرتتەدى. وسىلايشا بۇل پرەپارات «ادامدارعا قولدانۋعا ارنالعان ۆاكتسينا» رەتىندە سيپاتتالاتىن Covuity اتاۋىنا ءوتىنىم 30- مامىردا ە و- نىڭ قۇزىرەتتى ورگاندارىنا بەرىلدى. ولار بۇل ءوتىنىشتى قاراشا ايىنىڭ باسىندا ماقۇلدادى.
سونىمەن قاتار تاۋار تاڭباسىن تىركەۋگە ءوتىنىش امەريكا قۇراما شتاتتارىندا 1- ماۋسىمدا بەرىلدى، ءبىراق ول رۇقساتناما ءالى الىنعان جوق. Pfizer جانە Biontech «covuity.com» دومەندىك اتاۋىن تىركەگەنى اتالدى.