«اۋا رايى بۇزىلعان قازىرگىدەي جاعدايدا كولىك جۇرگىزۋشىلەرى بارىنشا ساق بولۋى كەرەك. قىس باستالعاندا تىركەلەتىن جول- كولىك وقيعالارىنىڭ باستى سەبەبى جۇرگىزۋشىلەردىڭ جىلدامدىق رەجيمىن، كولىك قۇرالدارى اراسىنداعى قاشىقتىقتى ساقتاماۋى سالدارىنان بولادى»، - دەپ ەسكەرتەدى مينيسترلىك وكىلدەرى.
قىس كەزىندە جۇرگىزۋشىلەر جولدا بارىنشا ساق بولىپ، دوڭگەلەكتەرىن ۋاقتىلى اۋىستىرۋى ءتيىس. سونىمەن قاتار، ءتارتىپ ساقشىلارى ءبىرقاتار وڭىرلەردىڭ تۇرعىندارىن جولعا شىقپاۋعا جانە اۋا رايى مەن جولداردىڭ جاي-كۇيى تۋرالى حابارلامالاردى ەسكەرۋگە كەڭەس بەرەدى.
ماسەلەن، اقمولا، سولتۇستىك قازاقستان، قوستاناي، شىعىس قازاقستان، اقتوبە جانە قاراعاندى وبلىستارىندا اۋا تەمپەراتۋراسى تومەندەيدى. تۇندە بۇل وڭىرلەردە -10 گرادۋس اياز، كەيبىر جەردە بۇرقاسىن بولادى. ءبىرقاتار وڭىرلەردە تۇمان، كوكتايعاق بولىپ، جەل كۇشەيۋى مۇمكىن. ءىىم جۇرگىزۋشىلەردى جاياۋ جۇرگىنشىلەردى كورگەن كەزدە ەرەكشە ساق بولۋعا شاقىرادى. جولدا قيىن جاعدايعا تاپ بولعان جول قوزعالىسىنىڭ بارلىق قاتىسۋشىلارى تاۋلىك بويى ىشكى ىستەر ورگاندارىنىڭ بولىمشەلەرىنە جۇگىنە الادى. بيىل قاراشا ايىنان باستاپ ەلدە 352 جول- كولىك وقيعاسى تىركەلىپ، 80 ادام كوز جۇمعان. 395 ادام ءتۇرلى دارەجەدەگى جاراقات العان.
اۆتور: ايان بەكەن ۇلى