نۇر- سۇلتان. قازاقپارات - كاسپيي يتبالىعى قازاقستاننىڭ قىزىل كىتابىنا ەنگىزىلدى. بۇگىن ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆ وسى ماسەلەگە قاتىستى پىكىرىن ءبىلدىردى، دەپ حابارلايدى قازاقپارات.
ءمينيستردىڭ سوزىنشە، كاسپيي يتبالىعىنىڭ قازاقستاننىڭ قىزىل كىتابىنا ەنۋى جانۋاردىڭ پوپۋلياتسياسىن ساقتاپ قالۋعا مۇمكىندىك بەرەدى.
«ق ر ۇكىمەتىنىڭ قاۋلىسىمەن كاسپيي يتبالىعى قىزىل كىتاپقا ەندى. بۇل شارا سانى سوڭعى ءجۇز جىلدا 1 ميلليوننان 100 مىڭعا ازايعان جانۋاردىڭ پوپۋلياتسياسىن ساقتاپ قالۋعا مۇمكىندىك بەرەدى»، - دەپ جازدى م. مىرزاعاليەۆ.
ەكولوگيا ءمينيسترى جانۋار پوپۋلياتسياسىن ساقتاۋ ءۇشىن قابىلدانىپ جاتقان شارالار تۋرالى دا ايتتى. «قازاقستاندا تەڭىز سۇتقورەكتىسىن ساقتاپ قالۋ بويىنشا ءبىرقاتار شارالار قابىلدانىپ جاتىر. وتكەن جىلدان بەرى اقتاۋ قالاسىندا كاسپيي يتبالىقتارىن زەرتتەۋ جانە رەابيليتاتسيالاۋ ورتالىعى قۇرىلدى. رەسەي فەدەراتسياسىنداعى ارىپتەستەرىمىزبەن بىرگە زەرتتەۋ جۇرگىزىپ، يتبالىق پوپۋلياتسياسىن ساقتاۋ بويىنشا بىرلەسكەن ارەكەت ەتۋ جوسپارىن ازىرلەپ جاتىرمىز»، - دەدى مينيستر.
ول سونىمەن بىرگە قازاقستاندىقتاردى جوعالىپ بارا جاتقان جانۋارلارعا قامقور بولۋعا شاقىردى. «جارالانعان يتبالىقتاردى كورگەندە جوعارىدا اتالعان ورتالىققا حابارلاسۋلارىڭىزدى وتىنەمىز»، - دەپ جازدى م. مىرزاعاليەۆ. كاسپيي يتبالىعى باسقا كاسپيي ماڭى ەلدەرىنىڭ قىزىل كىتاپتارىنا ەنگىزىلىپ قويعان.