مىندەتتى الەۋمەتتىك مەديتسينالىق ساقتاندىرۋ ارقىلى قانداي مەديتسينالىق كومەك الۋعا بولادى

الماتى. قازاقپارات - مىندەتتى الەۋمەتتىك مەديتسينالىق ساقتاندىرۋ ەنگىزىلگەلى بەرى جوعارى تەحنولوگيالاردىڭ كومەگىمەن جاسالاتىن مەديتسينالىق قىزمەت كولەمى ارتتى.

وسى جىلدىڭ 9 ايىندا الماتى قالاسى بويىنشا اتالعان قىزمەت تۇرلەرىنە 5,9 ميلليارد تەڭگەدەن استام قاراجات جۇمسالعان. بۇل تۋرالى م س ق الماتى قالالىق فيليالى ءمالىم ەتتى، دەپ حابارلايدى قازاقپارات ءتىلشىسى.

جوعارى تەحنولوگيالىق كومەك - مەديتسيناداعى كۇردەلى، بىرەگەي تەحنولوگيالاردىڭ كومەگىمەن، بىلىكتىلىگى جوعارى ماماندار تاراپىنان جاسالاتىن قىزمەت تۇرلەرى. بىرىنشىدەن، جۇرەككە جاسالاتىن وپەراتسيالار؛ جۇرەك، باۋىر، بۇيرەك الماستىرۋ؛ ميداعى ىسىكتى سىلىپ الۋ؛ تۇقىم قۋالايتىن جانە جۇيەلىك اۋرۋلاردى، لەيكوز، ەندوكريندىك جۇيەدەگى اقاۋلاردى ەمدەۋ؛ اسا كۇردەلى حيرۋرگيالىق وتا تۇرلەرى جاتادى. قازىرگى تاڭدا قازاقستاندىق دارىگەرلەر ونىڭ 70-كە جۋىق ءتۇرىن جاسايدى.

ايتا كەتەيىك، جوعارى تەحنولوگيالار ارقىلى جاسالاتىن قىزمەتتەر ساقتاندىرۋ پاكەتى شەڭبەرىندە كورسەتىلەدى.

«پاتسيەنت اۋرۋحاناعا جوسپارلى تۇردە جاتقىزىلىپ دايىندالادى. ەڭ الدىمەن پاتسيەنت تىركەلگەن ەمحاناسىنا حابارلاسادى. دارىگەر ونى اۋرۋحاناعا جاتقىزۋ بيۋروسىنا تىركەيدى. ول ءۇشىن سىرقاتتى قابىلدايتىن مەديتسينا ۇيىمىنىڭ كونسۋلتاتسياسى تالاپ ەتىلەدى. مەديتسينالىق قىزمەتتى جەرگىلىكتى دەڭگەيدە كورسەتۋ مۇمكىن بولماعان جاعدايدا كوميسسيا پاتسيەنتتى رەسپۋبليكالىق كلينيكالارعا جىبەرۋ مۇمكىندىكتەرىن قاراستىرادى. قۇجاتتار تولىق ءارى دۇرىس راسىمدەلگەن بولسا كوميسسيا ەكى كۇن ىشىندە شەشىم شىعارادى. وڭ شەشىم قابىلدانعاننان كەيىن پاتسيەنتكە جولداما بەرىلىپ، اۋرۋحاناعا جاتقىزاتىن كۇندى بەلگىلەيدى»، - دەپ ءتۇسىندىردى م س ق الماتى قالالىق فيليالى.

2020 -جىل باسىنان بەرى الماتى قالاسىنداعى №7 كلينيكالىق اۋرۋحانا جوعارى تەحنولوگيالىق قىزمەت تۇرلەرىن م ءا م س پاكەتى شەڭبەرىندە كورسەتە باستادى.

بۇگىندە اۋرۋحانا جوعارى تەحنولوگيالىق قىزمەتتىڭ نەيروحيرۋرگيا، قان- تامىر حيرۋرگياسى، تراۆماتولوگيا جانە ورتوپەديا، ينتەرۆەنسيالىق حيرۋرگيا، اريتمولوگيا سىندى باعىتتار بويىنشا 10 شاقتى ءتۇرىن كورسەتەدى. كلينيكا وكىلى ماقسات مامىرقۇلدىڭ سوزىنە سۇيەنسەك، اۋرۋحانانىڭ ماتەريالدىق- تەحنيكالىق بازاسى قۇنى 1,5 ميلليون- 6 ميلليون تەڭگەگە دەيىن باراتىن وتالاردى جاساۋعا مۇمكىندىك بەرەدى. ونىڭ ىشىندە جامباس جانە تىزە بۋىندارىن الماستىرۋ، جۇرەككە دەفيبريللياتور قويۋ، باس سۇيەك ىشىنە ستەنتتەر ورناتۋ، انيەۆريزماعا شالدىققان تامىرلاردى بىتەۋ سىندى وتا تۇرلەرى بار.

«بىزدە كورسەتىلەتىن جوعارى تەحنولوگيالىق قىزمەت كولەمى جىل سايىن ارتىپ كەلەدى. ماسەلەن، 2020 -جىلى ءبىزدىڭ كلينيكاعا ساقتاندىرۋ پاكەتى شەڭبەرىندە 1 ميلليارد تەڭگە ءبولىندى. بۇگىنگى كۇنى 170-تەن استام پاتسيەنت ەمدەۋ مەن دياگنوستيكا سالاسىنداعى ەڭ زاماناۋي تەحنولوگيالاردىڭ يگىلىگىن پايدالانىپ ۇلگەردى»، - دەيدى ماقسات مامىرقۇل.

م س ق الماتى فيليالى باسشىسى تىلەۋحان ابىلدايەۆتىڭ ايتۋىنشا، اتالعان قىزمەتتەر اقىسى مەديتسينالىق ساقتاندىرۋ قاراجاتى ەسەبىنەن تولەنىپ وتىر. «ساقتاندىرىلعان ازاماتتارعا بەرىلەتىن ارتىقشىلىق كوپ. ساقتاندىرۋ جۇيەسىندە جوسپارلى ەم قاجەت بولعان جاعدايدا ۋدز، ك ت، م ر ت سىندى قىزمەتتەردەن باستاپ، جوعارعى تەحنولوگيالىق كومەك تۇرلەرىنە دەيىنگى ارالىقتاعى كوپتەگەن قىزمەت تۇرلەرىن پايدالانۋعا مۇمكىندىك بار»، - دەدى فيليال باسشىسى.