«10-قاراشادا ەلورداداعى كوكتال شاعىن اۋدانىندا توبەلەس بولىپ، ونىڭ سالدارىنان پىشاق جاراقاتىنان 17 جاسار جانبولات اعادىل كوز جۇمدى. تەرگەۋ امالدارى بارىسىندا ەرەگەس ج ش س جۇمىسشىلارى مەن تالاپكەر ەلدى مەكەنى جاستارى اراسىندا بولعانى انىقتالدى»، - دەدى س. ءادىلوۆ مينيسترلىك ۇيىمداستىرعان ونلاين بريفينگىدە.
ونىڭ ايتۋىنشا، 6-قاراشادا كوكتالدا جاستار اراسىنداعى كيكىلجىڭ سوڭى توبەلەسكە ۇلاسقان. بۇل جانجالعا تالاپكەردەن كەلگەن وزگە ادامدارمەن بىرگە ج. اعادىل دە قاتىسقانى انىقتالدى. توبەلەستە ول پىشاق جاراقاتىن العان. اتالعان فاكتىلەر بويىنشا 293-بابى 3-بولىگى مەن 99-بابى 2-بولىگى بويىنشا قىلمىستىق ىستەر تۇرعىسىندا تەرگەۋ ءجۇرىپ جاتىر.
«اتالعان اۋماقتاعى ىزدەستىرۋ شارالارى بارىسىندا پاترۋلدىك پوليتسيا وكىلدەرى توبەلەستە بولعانداردىڭ بارلىعىن ۇستادى. پوليتسەيلەر ءىزىن سۋىتپاي نەگىزگى كۇدىكتىلەردى دە قولعا ءتۇسىردى. قازىرگى كەزدە توبەلەسكە قاتىسقان ءۇش ادام، ونىڭ ىشىندە ادام ولىمىنە قاتىستى كۇدىكتى ءبىر ادام ەلوردادا پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى»، - دەدى سانجار ءادىلوۆ.