وسكەمەندە ۇيىمداستىرىلعان ءوڭىرارالىق ونلاين فورۋمدا وسى سۇراقتارعا جاۋاپ بەرىلدى. جيىنعا شىعىس قازاقستان وبلىسى، قاراعاندى، پاۆلودار وبلىستارىنىڭ جەتەكشى مەكتەپ مۇعالىمدەرى قاتىستى. جيىن سوڭىندا مۇعالىمدەردىڭ ۆيرتۋالدى قاۋىمداستىعىن قۇرۋ تۋرالى شەشىم شىقتى. قازاقستاندا جەتەكشى مەكتەپتەردى دامىتۋعا وراي جوبانىڭ باستالعانىنا 5 جىل بولدى. ەلىمىزدىڭ شىعىسىندا بۇل تىزىمگە باستاپقىدا 71 ءبىلىم وشاعى ىلىكسە، قازىر ولاردىڭ سانى 115. ەندى مىنەكي وبلىستاعى وسىنداي مەكتەپتەردىڭ مىقتى مۇعالىمدەرى باس قوسىپ، پاۆلودارلىق جانە قاراعاندىلىق ارىپتەستەرىمەن ءبىر الاڭدا ونلاين تاجىريبە الماستى.
گۇلفاريدا رايسوۆا، ش ق و پەداگوگيكالىق شەبەرلىك ورتالىعىنىڭ ديرەكتورى:
- تەرەزەنىڭ ار جاعىندا ارىپتەستەرى نە ىستەپ جاتىر، ۆيرتۋالدى ءبىر- بىرىمەن ارالاسۋ. تەك ءوزىڭىزدىڭ اۋدان، وبلىس ىشىندە عانا ەمەس، 3 وبلىستىڭ ەڭ قۇندى، ەڭ جاقسى تاجىريبەسىن ءبولىسۋ جانە مۇعالىمدەرگە نە جەتپەۋدى، ونى شەبەرلىك سىنىپتارىندا كورسەتۋ.
فورۋمعا دەيىنگى زەرتتەۋلەر ناتيجەسى كەيبىر ءبىلىم پلاتفورمالارىن يگەرۋدە پروبلەمالار بار ەكەنىن كورسەتكەن. سول ءۇشىن ونلاين جينالعاندارعا سونداي پورتال جەتەكشىلەرىنىڭ ءبىرى شەبەرلىك ساعاتىن وتكىزدى. جالپى شىعىس قازاقستاندىق مۇعالىمدەردىڭ بۇل تۇرعىدا وزگە وڭىرلەرگە ۇسىنار جەتىستىكتەرى كوپ ەكەن.
گۇلنارا ابيتايەۆا شقو ءبىلىم باسقارماسى «شىعىس وڭىرلىك ورتالىعىنىڭ» كابينەت مەڭگەرۋشىسى:
- قىسقا مەرزىمدى جوسپار قۇرۋ جانە قاشىقتان ساباقتى قالاي وتكىزۋگە بولادى، وسىنداي سۇراق كوكەيلەرىندە جۇرگەن، شەشىمىن تابۋ ءۇشىن ادىستەمەلىك ۇسىنىستار جاسادىق، ول ادىستەمەلىك ۇسىنىستار ءبىزدىڭ ءبىلىم بەرۋ باسقارماسىنىڭ پورتالىندا ورنالاسقان. مىنەكي وسىنداي جۇمىستارمەن ءبىز ءوز تاجىريبەمىزبەن بولىستىك. جەتەكشى مەكتەپتەردىڭ اربىرىنە 5-6 قاراپايىم سەرىكتەس مەكتەپتەر بەكىتىلگەن. ماقسات وزگە ءبىلىم بەرۋ وشاقتارىن جەتىلدىرىپ، ءبىلىم ساپاسىن ارتتىرۋ. ال وسىنداي فورۋمدار پەداگوگتاردىڭ ءوزارا پىكىر الماسىپ، شەبەرلىكتەرىن ارتتىرۋدا تاپتىرماس مۇمكىندىك.
www.24.kz