الماتى وبلىسى پوليتسيا دەپارتامەنتىنىڭ ەسىرتكى بيزنەسىنە قارسى ءىس- قيمىل باسقارماسىنىڭ قىزمەتكەرلەرى سينتەتيكالىق ەسىرتكىلەردى زاڭسىز تاراتۋمەن اينالىسقان ءبىر توپ ادامدى ۇستادى.
«ءتارتىپ ساقشىلارى جەدەل- ىزدەستىرۋ ءىس- شارالارى مەن جاسىرىن تەرگەۋ جۇرگىزدى. ونىڭ بارىسىندا بەس ادامنان قۇرالعان توپ انىقتالدى. ولاردىڭ بارلىعى - تالدىقورعان قالاسىنىڭ 24-28 جاس ارالىعىنداعى تۇرعىندارى. كۇدىكتىلەر ۇزاق ۋاقىت بويى ينتەرنەت جەلىسى، تەلەگرام مەسەندجەرى ارقىلى سينتەتيكالىق ەسىرتكىلەردى زاڭسىز تاراتۋمەن اينالىسقان. ولار ەسىرتكى زاتتارىن جاسىرىن ورىندار ارقىلى تاراتقان»، - دەدى الماتى وبلىسى پ د باستىعىنىڭ ورىنباسارى پوليتسيا پودپولكوۆنيگى دانيار مەندەبايەۆ.
كۇدىكتىلەردىڭ ءبىرىنىڭ پاتەرىن سانكسيالانعان ءتىنتۋ بارىسىندا ىشىندە قوڭىر ءتۇستى وسىمدىك زاتى بار، ساتۋعا دايىندالعان 250 ورام الىندى. سونىمەن قاتار، اق ءتۇستى ۇنتاق زات جانە جاسىل ءتۇستى وسىمدىك زاتى بار ەكى پوليەتيلەن پاكەت تابىلدى. بارلىق الىنعان زاتتار بويىنشا ساراپتاما تاعايىندالدى.
«بۇگىنگى كۇنى كۇدىكتىلەرگە قاتىستى ق ر ق ك 297-بابىنىڭ 1، 3-بولىكتەرى بويىنشا قىلمىستىق ءىس قوزعالدى، ياعني ەسىرتكى قۇرالدارىن، پسيحوتروپتىق زاتتاردى جانە سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نە وتكىزۋ. بارلىق كۇدىكتىلەر ۋاقىتشا ۇستاۋ وقشاۋلاعىشىنا قاماققا الىندى»، - دەپ تولىقتىردى پوليتسيا پودپولكوۆنيگى دانيار مەندەبايەۆ.
اۆتور: سامال قابىشيەۆا