ۆلاديمير پۋتين مەن رەجەپ تايىپ ەردوعان تاۋلى قاراباق كەلىسىمىنە قاتىستى پىكىر الماستى

اڭگىمە بارىسىندا ر ف، ازەربايجان مەن ارمەنيا اراسىنداعى تاۋلى قاراباقتا اتىستى توقتاتۋ كەلىسىمى تالقىلاندى، دەپ حابارلايدى قازاقپارات.

تاسس اگەنتتىگىنىڭ مالىمەتىنشە، ۆلاديمير پۋتين تۇرىك ارىپتەسىنە 9- قاراشا كۇنى ازەربايجان پرەزيدەنتى يلحام اليەۆپەن جانە ارمەنيا پرەمەر-ءمينيسترى نيكول پاشينيانمەن جاسالعان ءۇشجاقتى كەلىسىم تۋرالى اقپارات بەرگەن.

رەجەپ تايىپ ەردوعان رەسەيدىڭ ءبىتىستىرۋشى تاراپ رەتىندەگى كۇش-جىگەرىن جوعارى باعالاپ، بۇل جاعداي تاۋلى قاراباق داۋىن رەتتەۋدىڭ ۇزاق مەرزىمدى جانە ءبارىن تەگىس قامتيتىن ساتىسىنا وتۋگە جاقسى نەگىز بولاتىنىن ايتقان.

ەكى ەل باسشىسى سونىمەن قاتار اتىستى تولىق توقتاتۋ كەلىسىمىنىڭ ماڭىزىن اتاپ ءوتتى.

بۇل اسكەري ءىس-ارەكەتتى ۇزۋگە مۇمكىندىك بەرگەن. انادولى اگەنتتىگىنىڭ جازۋىنشا، تۇركيا پرەزيدەنتى رەجەپ تايىپ ەردوعان كەلىسسوز بارىسىندا كەشە كەشكىسىن تاۋلى قاراباق پروبلەماسىن تۇپكىلىكتى شەشۋگە دۇرىس قادام جاسالعانىن ايتقان.

تۇرىك رەسپۋبليكاسى پرەزيدەنتىنىڭ سوزىنە سەنسەك، بۇل كەزەڭدە ەڭ ماڭىزدى ماسەلە - ارمەنيانىڭ ازەربايجان، ر ف جانە ارمەنيا اراسىندا جاسالعان ءۇشجاقتى كەلىسىمنىڭ تالاپتارىن بۇلجىتپاي ورىنداپ، وق اتپاۋى.

ەسكە سالا كەتەيىك، كەشە رەسەي پرەزيدەنتى ۆلاديمير پۋتين تاۋلى قاراباقتا اتىستى توقتاتۋ تۋرالى كەلىسىم جاسالعانىن مالىمدەگەن ەدى. اتالعان قۇجاتقا ازەربايجان رەسپۋبليكاسىنىڭ پرەزيدەنتى يلحام اليەۆ، ارمەنيا رەسپۋبليكاسىنىڭ پرەمەر-ءمينيسترى نيكول پاشينيان جانە رەسەي فەدەراتسياسىنىڭ پرەزيدەنتى ۆلاديمير پۋتين قول قويعان.

وندا 2020-جىلعى 10- قاراشادا ماسكەۋ ۋاقىتى بويىنشا 00 ساعات 00 مينۋتتان باستاپ تاۋلى قاراباق ايماعىنداعى اتىستى جانە بارلىق اسكەري ارەكەتتەردى تولىق توقتاتۋ تۋرالى كەلىسىم جاريالانعان.