ايتا كەتەيىك، بۇعان دەيىن ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ الداعى ءماجىلىس سايلاۋىنا كىمدەر قاتىسا الاتىنىن تۇسىندىرگەن بولاتىن.
بەكىتىلگەن جوسپارعا سايكەس، كانديداتتاردى ۇسىنۋ كەزەڭى داۋىس بەرۋ كۇنىنەن ەكى اي بۇرىن باستالادى جانە داۋىس بەرۋ كۇنىنەن قىرىق كۇن بۇرىن جەرگىلىكتى ۋاقىتپەن ساعات ون سەگىزدە اياقتالادى. ياعني، 10- قاراشادان باستاپ 30- قاراشا ساعات 18:00 گە دەيىن.
پارتيالىق ءتىزىمدى تىركەۋ سايلاۋدان ەكى اي بۇرىن باستالادى جانە سايلاۋعا ءبىر اي قالعاندا جەرگىلىكتى ۋاقىتپەن ساعات 18:00 دە اياقتالادى. ياعني، 2020-جىلعى 10- قاراشادان 10- جەلتوقسان كۇنگى ساعات 18:00 گە دەيىن.
زاڭعا سايكەس، سايلاۋ الدىنداعى ۇگىت پارتيالىق تىزىمدەردى تىركەۋ مەرزىمى اياقتالعان كەزدەن باستالادى جانە سايلاۋ بولاتىن كۇننىڭ الدىنداعى كۇنگى جەرگىلىكتى ۋاقىت بويىنشا ساعات 00:00 دە اياقتالادى.
وسىلايشا، پارتيالىق ءتىزىم بويىنشا سايلاناتىن پارلامەنت ءماجىلىسى دەپۋتاتتارىنىڭ كەزەكتى سايلاۋىنىڭ جالپى ۇزاقتىعى - تاعايىندالعان كۇننەن باستاپ داۋىس بەرۋ كۇنىنە دەيىن 82 كۇن.
كونستانتين پەتروۆتىڭ ايتۋىنشا، بارلىق دەڭگەيدەگى ءماسليحات دەپۋتاتتارىنىڭ كەزەكتى سايلاۋى ءبىر مەزگىلدە وتكىزىلەدى جانە مەرزىمى جاعىنان پرەزيدەنتتى، پارلامەنت سەناتى دەپۋتاتتارىن سايلاۋمەن تۇسپا-تۇس كەلمەۋگە ءتيىس.
ءماسليحات سايلاۋىن ق ر پارلامەنتى ءماجىلىسى دەپۋتاتتارىن سايلاۋمەن ءبىر مەزگىلدە وتكىزۋ بويىنشا شەكتەۋ جوق. جالپى، الداعى ناۋقاندا 216 ءماسليحاتتىڭ 3276 دەپۋتاتى سايلانۋعا ءتيىس. وسى ورايدا وبلىستاردىڭ، نۇر-سۇلتان، الماتى جانە شىمكەنت قالالارى ءماسليحاتتارىنىڭ 589 دەپۋتاتى، وبلىستىق ماڭىزى بار قالالاردىڭ 36 ءماسليحاتىندا 596 دەپۋتات، اۋدانداردىڭ 163 ءماسليحاتىندا 2091 دەپۋتات قامتىلماق.
بىرىنشىدەن، ءماسليحاتقا سايلاۋ العاش رەت ساياسي پارتيالاردىڭ پارتيالىق تىزىمدەرى بويىنشا وتۋدە.
ەكىنشىدەن، سايلاۋ تۋرالى كونستيتۋتسيالىق زاڭداعى وزگەرىستەرگە سايكەس، ءتيىستى اكىمشىلىك اۋماق ىشىندە ءماسليحات دەپۋتاتتارىن سايلاۋ كەزىندە ءبىرىڭعاي اۋماقتىق سايلاۋ وكرۋگى قۇرىلادى.
جاسى جيىرماعا تولعان قازاقستان رەسپۋبليكاسىنىڭ ازاماتى ءماسليحات دەپۋتاتى بولىپ سايلانا الادى.
رەسپۋبليكا ازاماتى ءبىر ءماسليحاتتىڭ عانا دەپۋتاتى بولا الادى. وسىعان سايكەس دەپۋتاتتىققا كانديداتتاردى ۇسىنۋ كەزەڭى 2020-جىلعى 10- قاراشادان باستاپ 2020-جىلعى 4- جەلتوقساندا جەرگىلىكتى ۋاقىت بويىنشا ساعات 18:00 گە دەيىن جالعاسادى.
ءماسليحات دەپۋتاتتىعىنا كانديداتتاردى تىركەۋ 10- جەلتوقساندا جەرگىلىكتى ۋاقىت بويىنشا ساعات 18:00 دە اياقتالادى. سايلاۋ الدىنداعى ۇگىت-ناسيحات 10- جەلتوقساندا جەرگىلىكتى ۋاقىتپەن ساعات 18:00 دەن كەيىن باستالادى جانە 2021-جىلعى 9- قاڭتاردا اياقتالادى.
بۇدان بۇرىن حابارلانعانداي، مەملەكەت باسشىسى قاسىم-جومارت توقايەۆ ق ر پارلامەنتى ءماجىلىسى جانە ءماسليحات سايلاۋىن وتكىزۋ جونىندە ۇندەۋ جاريالادى.