ەسىرتكى ساتاتىن ادامداردى انىقتاۋ بويىنشا ارنايى وپەراتسيانى پوليتسيا وسى جىلدىڭ 6-قاراشاسىندا وتكىزگەن. ارنايى وپەراتسيا بارىسىندا گەروين ساتۋ كەزىندە 37 جاستاعى ەر ادام مەن ونىمەن بىرگە تۇراتىن 49 جاستاعى ايەل ۇستالعان. پوليتسيا قىزمەتكەرلەرى ۇستالعاندار تۇرعىلىقتى جەرىندە ەسىرتكى ساتاتىن ساۋدا نۇكتەسىن ۇيىمداستىرعانىن انىقتاعان. ەرلى- زايىپتىلاردىڭ پاتەرىن تەكسەرۋ كەزىندە ولاردان - ەسىرتكى قاباتتارى بار ەلەكتروندى تارازى، 1 ميلليون تەڭگەدەن استام سوماداعى قولما- قول اقشا، سونداي- اق «گەروين» سالىنعان 2 پوليەتيلەن پاكەت جانە دايىندالعان ەسىرتكى سالىنعان ورالعان 25 قاعاز پاكەت تابىلعان. زاڭسىز بيزنەستەگى «سەرىكتەستەردىڭ» ءرولى ناقتى بولىنگەن كورىنەدى. ال ەسىرتكى ساۋداسىنان تۇسكەن اقشا جالپى وتباسىلىق بيۋدجەتكە ءتۇسىپ وتىرعان.
«ايەل جەتكىزۋشىلەرمەن بايلانىستى ۇستاپ، ەسىرتكىنى بۋىپ- ءتۇيىپ، قاراجاتتىڭ بولىنۋىنە جاۋاپتى بولعان. ال ونىڭ كۇيەۋى تىكەلەي ەسىرتكى ساتۋمەن اينالىسىپ كەلگەن»، - دەيدى نۇر- سۇلتان قالالىق پوليتسيا ءبولىمى پوليتسيا باستىعىنىڭ ورىنباسارى پوليتسيا پولكوۆنيگى ەرلان اكباروۆ.
ايەلدىڭ بۇعان دەيىن دە ەسىرتكى ساتقانى ءۇشىن ەكى رەت سوتتالعانى بەلگىلى بولىپ وتىر. جەدەل شارالاردىڭ ناتيجەسىندە ەسىرتكىنى تۇتىنۋ ءۇشىن زاڭسىز اينالىمنان شامامەن 400 گرامم گەروين الىنعان. ونىڭ باعاسى «قارا نارىقتا» اقشالاي تۇردە ءبولىپ ساتان جاعدايدا 6 ميلليون تەڭگەدەن اسادى. ۇستالعان ادامدار قازىر قىلمىستىق كودەكستىڭ 297-بابى 4-بولىگى بويىنشا قىلمىستىق جاۋاپكەرشىلىككە تارتىلعان. كىناسى دالەلدەنگەن جاعدايدا ولار 7 جىلدان 25 جىلعا دەيىن باس بوستاندىعىنان ايىرىلۋى مۇمكىن.