بۇل تۋرالى قازاقپارات dw.com-عا cىلتەمە جاساپ حابارلايدى. تومەنگى ساكسونياداعى ۆيسسەلحيەۆەدە قالاسىنىڭ ماعىندا تۇراتىن ماركۆارد وتباسىنىڭ فەرماسىندا 60 نار (درومەدار) مەن قوس وركەشتى (باكتريان) تۇيە مەكەندەيدى. تۇيەنى نەگىزىنەن تۋريستەردى مىنگىزىپ، ادەمى جەرلەرمەن قىدىرتۋ ءۇشىن پايدالانعان.
Dpa اقپاراتتىق اگەنتتىگىنىڭ حابارلاۋىنشا، ەۋروپالىق ءسۇت ونىمدەرىن ءوندىرۋشىنىڭ رۇقساتىن العان فەرما الداعى ۋاقىتتا بوتەلكەگە قۇيىلعان پاستەرلەنگەن تۇيە ءسۇتىن شىعارۋدى باستاپ، ونى ساتا الادى. ءونىمدى ەۋرووداقتىڭ بارلىق ەلدەرىنە جەتكىزۋگە قۇقىق بەرەتىن سەرتيفيكاتتى رەسىمدەۋ ءۇشىن بىرنەشە شارتتى ورىنداۋ قاجەت بولعان. ءسۇتتىڭ ءبىر ءليترىنىڭ باعاسى 11 ەۋرو شاماسىندا. مۇندا تۇيە ءسۇتى بۇرىن دا ساتىلعان، ءبىراق جاڭا ساۋىلعان قۇيىلمالى سۋسىن ساتىپ الۋشىلارعا وسى جەردە عانا بەرىلەتىن. بۇل گەرمانيادا تۇيە ءسۇتىن ساتۋمەن اينالىساتىن ازىرگە جالعىز فەرما. فەرمانىڭ يەسى بەكە ماركۆاردتىڭ (Beke Marquard) ايتۋىنشا، پاستەرلەۋ ياعني، 72 گرادۋسقا دەيىن عانا قىزدىرۋ، ءسۇتتىڭ تاعامدىق قاسيەتىن جاقسى ساقتاۋعا كومەكتەسەدى. بۇل ونىمگە تاپسىرىس بەرلين قالاسى مەن ەلدىڭ شىعىسىنداعى گارتس اۋدانىنان بەرىلدى. سونداي- اق ىرىمشىك ءوندىرىسى ءۇشىن اۋستريادان تاپسىرىس تۇسكەن.