الەمدى اۋرەلەگەن ىندەتتىڭ ءالى باسىلاتىن ءتۇرى بايقالمايدى. شولىپ كورەلىك.
پولشا اۋرۋحانالارىندا ناۋقاستاردى قابىلدايتىن ورىندار جەتىسپەي، كەزەكتە تۇرعان جەدەل جاردەم كولىكتەرى كوبەيگەن. بۇل ەلدىڭ بيلىگى كەشە جاڭا شەكتەۋلەر ەنگىزىلەتىنىن جاريالاعان. وعان سايكەس بارلىق كينوتەاتر مەن تەاترلار، مۇراجاي، قوعامدىق جانە مۋزىكالىق ورتالىقتار جابىلادى. ەگەر بۇل شارالار ناتيجە بەرمەي ۆيرۋس جۇقتىرعاندار كوبەيسە جالپىۇلتتىق كارانتين ەنگىزىلمەك.
ا ق ش- تا ءبىر كۇندە كوروناۆيرۋس جۇقتىرعاندار سانى 50 پايىزعا وسكەن. وسىدان ەكى كۇن بۇرىن عانا 125 مىڭنان استام جاڭا دەرەك تىركەلدى. بۇل - پاندەميا باستالعالى بەرگى ەڭ جوعارى كورسەتكىش. ءتىپتى، اق ءۇيدىڭ اپپارات باسشىسى مارك مەدوۋزتىڭ ءوزى ينفەكتسيا جۇقتىرعان. ساراپشىلار الداعى ۋاقىتتا امەريكاداعى كوروناۆيرۋس احۋالى ودان سايىن ناشارلاي تۇسەدى دەپ وتىر. ويتكەنى قازىر ەلدە شامامەن 11 مىڭ ادام جانساقتاۋ بولىمىندە جاتىر ەكەن. ەلدىڭ كەي وڭىرلەرىندەگى اۋرۋحانالاردا كوروناۆيرۋس جۇقتىرعان ناۋقاستارعا ارنالعان توسەك- ورىندار سانى ازايىپ بارادى. بۇل دەنساۋلىق ساقتاۋ جۇيەسىنىڭ وتە قيىن كەزەڭدى باستان وتكەرىپ جاتقاندىعىن كورسەتەدى. ءبىر جاقسى جاڭالىق بەلگيادا. كوروناۆيرۋستىڭ ەكىنشى تولقىنى شارىقتاۋ شەگىنە جەتىپ، قايتا تومەندەي باستاعانعا ۇقسايدى.
بريۋسسەلدە وتكەن باسپا ءسوز ءماسليحاتىندا كورولدىكتىڭ كوروناۆيرۋسقا قارسى شتابىنىڭ رەسمي وكىلى سولاي دەدى. ونىڭ ايتۋىنشا، بەلگيادا ينفەكتسيانىڭ ەكىنشى تولقىنىنىڭ شارىقتاۋ شەگى 27 - قازاندا وتكەن بولۋىن مۇمكىن. سەبەبى سول كەزدە ۆيرۋس جۇقتىرۋ دەرەگى 22 مىڭعا جەتكەن. ال سوڭعى اپتادا كۇنىنە ورتا ەسەپپەن 13 مىڭ جاڭا دەرەكتەن تىركەلىپ وتىرعان. بۇل الدىڭعى اپتامەن سالىستىرعاندا 16 پايىزعا از. ستاتسيونارلاردا 7 مىڭنان استام ناۋقاس ەمدەلىپ جاتىر. ولاردىڭ 1400 گە جۋىعى جانساقتاۋ بولىمىندە. جالپى ىندەت باستالعالى بەرى بەلگيادا 480 مىڭداي ادام ينفەكتسياعا شالدىققان. 12 جارىم مىڭعا جۋىق ناۋقاس قايتىس بولعان.
پورتۋگاليا اۋرۋحانالارىنا كوروناۆيرۋسپەن تۇسكەندەردىڭ سانى وسكەن. مامانداردىڭ ايتۋىنشا، قازان ايىندا ىندەت كۇرت كۇشەيگەن. مىسالى، ناۋرىزدان قىركۇيەكتىڭ سوڭىنا دەيىن قاۋىپتى دەرتكە شالدىققاندار سانى 25 مىڭعا جۋىقتاسا، قازان ايىندا 55 مىڭعا جەتكەن. ەلدەگى احۋالدىڭ ناشارلاۋىنا بايلانىستى ەل پرەزيدەنتى مارسەلۋ رەبەلۋ دە سوۋزا پارلامەنتتەن كەلەسى اپتادان باستاپ 15 كۇن توتەنشە جاعداي ەنگىزۋدى ۇسىندى. پورتۋگاليادا قازىر كوروناۆيرۋستى جۇقتىرعاندار 160 مىڭنان اسادى.
فرانتسيادا كوروناۆيرۋس ينفەكتسياسىنىڭ ورشۋىنە بايلانىستى احۋال ناشارلاعان. بۇل ەلدە سوڭعى ءبىر تاۋلىكتە 58 مىڭ ادام ۆيرۋس جۇقتىرىپ العان. دارىگەرلەرگە تۇسكەن اۋىرتپالىقتى جەڭىلدەتۋ ءۇشىن ۇكىمەت اسكەريلەردى پايدالانىپ، كوپ زارداپ شەگىپ جاتقان ايماقتارداعى ناۋقاستاردى وزگە وڭىرلەرگە تاسىمالداۋعا كوشتى.
پاريجدە جاڭا شەكتەۋلەر ەنگىزىلدى. تۇندە تاماق ساتۋ مەن جەتكىزۋگە تىيىم سالىندى. جوعارعى سىنىپ وقۋشىلارىنىڭ ءبىر بولىگى قايتا قاشىقتان وقۋعا اۋىستىرىلدى. بيلىك حالىق شەكتەۋلەردى ساقتاماسا، ىندەتتىڭ ەكىنشى تولقىنى ۇزاققا سوزىلاتىنىن ەسكەرتتى.
نورۆەگيا بيلىگى دە ايماقتا شەكتەۋ شارالارىن قاتايتىپ جاتىر. ماماندار ەل تۇرعىندارىن سانيتارلىق تالاپتاردى ساقتاپ، ۇيدەن شىقپاۋعا شاقىرادى. سونىمەن قاتار ءبىر ۋاقىتتا 5 ادامنان ارتىق قوناق شاقىرۋعا، جينالۋعا بولمايدى. بارلىق قوعامدىق تاماقتانۋ ورىندارىنىڭ جۇمىس ۋاقىتى قىسقارتىلادى. ال كوروناۆيرۋستى انىقتايتىن تەست ناتيجەسى جوق جولاۋشىلار ەل اۋماعىنا كىرە المايدى.
گرەكيادا قاۋىپتى ۆيرۋستىڭ تارالۋىنا بايلانىستى جاڭا شەكتەۋ شارالارى قاراشا ايىنىڭ سوڭىنا دەيىن جالعاسپاق. ەندى تۇرعىندار اسا قاجەتتىلىك بولماسا ۇيدەن شىعا المايدى. تەك سەبەپ بولعان جاعدايدا ارنايى نومىرگە حابارلاندىرۋ جىبەرۋ كەرەك. سونىمەن قاتار اۋدانارالىق قاتىناسقا تىيىم سالىنىپ، ايماقتاعى ءوندىرىس ورىندارىنىڭ جۇمىسى توقتاتىلادى.
بۇل شەكتەۋلەردىڭ ازىق- تۇلىك دۇكەندەرى، ءدارىحانا، مەديتسينالىق ورتالىقتار، مەكتەپتەر مەن بالاباقشالارعا قاتىسى جوق. ۆيرۋس جۇقتىرۋ دەرەگى كوپ تىركەلگەن ەلدەر وسىلايشا ءتۇرلى شەكتەۋ شارالارىن ەنگىزىپ جاتىر. وسى شەكتەۋلەر وڭ اسەر ەتەر بولسا، ءبارى وڭالار.