قاراجاتتى قايتارۋ تۋرالى كەيىنىرەك حابارلانادى.
بۇل تۋرالى كولىك جانە جول-كولىك ينفراقۇرىلىمىن دامىتۋ باسقارماسى ءبولىم باسشىسىنىڭ مىندەتىن اتقارۋشى مارات ەسەركەپوۆ مالىمدەدى، دەپ حابارلايدى قازاقپارات.
اكىمدىكتىڭ مالىمەتىنشە، «استانا اۆتوتۇراق كەڭىستىگى» ۇيىمىنىڭ پاركوماتتارى جۇمىس ىستەمەۋى كەرەك.
«ولار رەسمي رۇقسات الماعان. ازاماتتارعا نۇرجول بۋلۆارىن قوسپاعاندا، بۇل ورىندارعا اقى تولەۋدىڭ قاجەتى جوق. پاركوماتتاردى پايدالانۋعا رۇقسات الىنباعاندىقتان، قالالىق بيۋجەتكە قاراجات تۇسپەگەن، ال ءىس جۇزىندە ادامدار سەرىكتەستىكتىڭ رۇقسات ەتىلمەگەن پاركوماتتارىنا اقشا تولەگەن كەزدە، اقشا سەرىكتەستىكتىڭ وزىنە اۋدارىلعان»، - دەپ ءتۇسىندىردى مارات ەسەركەپوۆ.
كولىك باسقارماسى مەملەكەتتىك كىرىستەر دەپارتامەنتىنە «استانا اۆتوتۇراق كەڭىستىگى» ج ش س- نە قاتىستى قازاقستان رەسپۋبليكاسىنىڭ زاڭناماسىنا سايكەس ءتيىستى شارالار قابىلداۋ ماقساتىندا حات جولدادى.
«قازىرگى ۋاقىتتا ءبىز مەملەكەتتىك كىرىستەر دەپارتامەنتىنىڭ شەشىمىن كۇتىپ وتىرمىز، جاۋاپ العاننان كەيىن تولەم قاراستىرىلماعان تۇراق ورىندارى ءۇشىن الىنعان قاراجاتتى قايتارۋ مەحانيزمى تۋرالى قوسىمشا اقپارات بۇقارالىق اقپارات قۇرالدارىندا جاريالانادى»، - دەپ ءتۇسىندىردى سپيكەر.
ەسكە سالايىق، نۇر-سۇلتان اكىمدىگى كەلىسىمشارت مىندەتتەمەلەرىن ورىنداماعانى جانە تالاپتاردى ەلەمەگەنى ءۇشىن سوتقا «استانا اۆتوتۇراق كەڭىستىگى» ج ش س- مەن كەلىسىمشارتتى بۇزۋ تۋرالى ارىز بەرگەن.
جابدىقتى بولشەكتەۋ قاجەتتىلىگى تۋرالى سەرىكتەستىككە بىرنەشە رەت حابارلاما جىبەرىلدى، وتىنىشتەر ەلەنبەدى. «استانا اۆتوتۇراق كەڭىستىگى» ج ش س بىرنەشە زاڭبۇزۋشىلىقتارى مەن تۇرعىنداردىڭ شاعىمدارىنا بايلانىستى ەلوردا اكىمدىگى جوبانى كەڭەيتۋدى توقتاتا تۇرۋ تۋرالى شەشىم شىعارىپ، كەلىسىمشارتتى بۇزۋ تۋرالى سوتقا ارىز بەردى.