ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ەلىمىزدە كوروناۆيرۋستى قايتادان جۇقتىرعان ادامدار تۋرالى سۇراق قويىلدى.
«كەيبىر ەلدەن وسىنداي جاڭالىق شىعىپ جاتىر. قايتادان اۋىرعان ادامداردىڭ ءبىر- ەكى جاعدايى تىركەلگەنىن الەم ەلدەرىندە دارىگەرلەر وزدەرىنىڭ اقپاراتتارىندا جازىپ جاتىر. باتىس قازاقستانداعى بولعان جاعداي - ول باتىس قازاقستان وبلىسىندا ەڭ ءبىرىنشى بولعان جاعداي. ءبىرىنشى رەت ول كىسى اۋىرعاندا ەپيدەميولوگيالىق انامنەزى، ياعني كىمنەن جۇققانى، قايدان كەلگەنى بەلگىسىز بولدى. سوندىقتان قازىرگى تاڭدا وسىعان بايلانىستى قايتادان اۋىردى دەگەندى كوميسسيا تاراپىنان ماماندار قاراپ، ەسەپتەمەي وتىر. ءبىراق قاراعاندى وبلىسىندا قازىر ءبىر جاعداي تىركەلدى.
ءبىرىنشى جاعدايىندا دا اۋرۋدىڭ تولىق كلينيكالىق سيپاتى بولعان. بارلىق ينسترۋمەنتالدىق، زەرتحانالىق اناليزبەن دالەلدەنگەن. ەكىنشى جاعداي، وسى قازان ايىنىڭ ىشىندە سونداي اۋرۋمەن قايتا ءتۇسىپ، پ ت ر- تەستى وڭ بولعان. سوندىقتان وسىنى ءبىز قايتادان اۋىرعان جاعداي دەپ تىركەپ وتىرمىز»، - دەدى ۆيتسە- مينيستر.
وسى ورايدا ول قاراعاندى وبلىسىندا اۋرۋدى قايتا جۇقتىرۋ ناقتى مالىمەت رەتىندە تىركەلگەنىن ايتتى. بۇدان بۇرىن حابارلانعانداي، باتىس قازاقستان وبلىسىندا ءبىر ادامنىڭ كوروناۆيرۋستى قايتا جۇقتىرۋ دەرەگى تىركەلگەنى ايتىلعان ەدى.
اۆتور: رۋسلان عابباسوۆ