بۇل قۇجات كىتاپحانا مەن مينيسترلىكتىڭ بىرلەسكەن مادەني-اعارتۋ جانە عىلىمي- زەرتتەۋ جوبالارىن جۇزەگە اسىرۋعا، زەرتتەۋ باعدارلامالارىن، عىلىمي-پراكتيكالىق ءىس-شارالار، كونفەرەنسيا، فورۋم، سەمينارلار ۇيىمداستىرۋعا مۇمكىندىك بەرەدى.
كەلىسىمگە ەلباسى كىتاپحاناسىنىڭ ديرەكتورى ءامىرحان راحىمجانوۆ پەن ءبىلىم جانە عىلىم ءمينيسترى اسحات ايماعامبەتوۆ قول قويدى.
«نەگىزگى ىنتىماقتاستىققا باعىتتالعان مەموراندۋم ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ ىشكى جانە سىرتقى ساياساتتاعى باستامالارى مەن جاھاندىق يدەيالارىن كەلەشەكتە اقپاراتتىق- يميدجدىك ىلگەرىلەتۋگە جانە قازاقستاننىڭ جان-جاقتى وركەندەۋى مەن دۇنيەجۇزىلىك قاۋىپسىزدىك جۇيەسى يدەيالارىن ودان ءارى حالىقارالىق دەڭگەيگە دامىتۋعا باعىتتالعان»، - دەدى ءامىرحان راقىمجانوۆ مەموراندۋمعا قول قويۋ راسىمىندە.
ءوز كەزەگىندە ءبىلىم ءمينيسترى ەلباسى قورىن جاڭا عيماراتىنىڭ اشىلۋىمەن قۇتتىقتادى جانە بۇل ورىننىڭ ءبىلىم جانە عىلىم سالاسى ءۇشىن وتە ماڭىزدى ەكەنىن ايتتى.
«ەلباسى ۇسىنعان «رۋحاني جاڭعىرۋ» باعدارلاماسى ءبىلىم جانە عىلىم سالاسىندا دا كەڭىنەن جۇزەگە اسىرىلىپ جاتىر. باعدارلاما اياسىندا بالالاردى ناقتى وسى مۋزەيگە اكەلىپ، ساباق وتكىزۋدىڭ ماڭىزى زور دەپ ويلايمىن. الداعى ۋاقىتتا دا ورتاق جۇمىستى ۇيىمداستىرامىز. بالالاردان بۇرىن، وزىمىزگە دە قىزىقتى بولدى. مۇندا جادىگەرلەر، قازىرگى زامانعا ساي ءارتۇرلى كىتاپتار، جالپى ەلىمىزدىڭ تاريحى بار»، - دەدى ا. ايماعامبەتوۆ.
سونىمەن بىرگە، مينيستر مۇنىڭ الدىندا دا ءبىراز جۇمىس جاسالعانىن، تەك جوو سالاسىندا ەمەس، بالاباقشا، مەكتەپ پەن كوللەدج، عىلىم سالاسىندا ۇلكەن جۇمىس جۇرگىزىلگەنىن اتاپ ءوتتى.
«بۇل جۇمىستى ءارى قاراي دا بىرگە جالعاستىرامىز دەپ ويلايمىن. ءالى دە جاڭا باستامالار بولادى. سيمپوزيۋمدار، دوڭگەلەك ۇستەلدەر، كونفەرەنسيالار وتكىزەمىز. ەسسە بايقاۋىن وتكىزۋگە دە بولادى. مەموراندۋم اياسىندا ناقتى جۇمىس جوسپارىن بەكىتىپ الساق، بالاباقشادان باستاپ ورتا ءبىلىم، جوعارى ءبىلىم مەن عىلىم سالاسىندا سول كەستەگە سايكەس جۇمىس اتقارىلسا دەپ جوسپارلاپ وتىرمىز»، - دەدى اسحات ايماعامبەتوۆ.
اۆتور: ايجان سەرىكجان قىزى