ەلورداداعى س. سەيفۋللين اتىنداعى قازاق اگروتەحنيكالىق ۋنيۆەرسيتەتىندە وتكەن شاراعا «دالا» مەن «قالا» كوماندالارى قاتىسىپ، جاستار «دالا جاقسى ما، قالا جاقسى ما؟ « دەگەن ساۋال توڭىرەگىندە پىكىر ءوربىتتى.
«ماقتاۋ»، «ساقتاۋ»، «باپتاۋ» راۋندتارى ارقىلى وتكەن پىكىرتالاس بارىسىندا «دالا» كومانداسىنىڭ مۇشەلەرى بوتاجان مەن نۇرسۇلتان اۋىلدىڭ جاقسى تۇستارىن ايتىپ، وندا تۇرۋدىڭ قولايلى ەكەندىگىن دالەلدەۋگە تىرىستى.
«اۋىلدىڭ ەكولوگياسى وتە تازا. سوندىقتان دا وندىرىلەتىن ءونىمنىڭ بارلىعى دا ساپالى ءارى ادام اعزاسى ءۇشىن وتە پايدالى بولىپ كەلەدى. بۇعان قوسا، قايماعى بۇزىلماعان قازاق اۋىلدارىندا اتا- بابامىزدىڭ سالت- ءداستۇرى ساقتالىپ، قوناقجايلىق قاسيەتى بۇزىلماعان. اۋىلدا تۇرساڭىز تازا اۋادا دەمالىپ، ەكولوگيالىق تازا اس ءىشىپ قانا قويماي رۋحاني جاعىنان باي بولاسىز»، - دەدى بوتاجان.
ال «قالا» كومانداسىنىڭ مۇشەلەرى شەرحان مەن اياۋلىم قالادا ءومىر ءسۇرۋ ادام ءۇشىن بارىنشا قولايلى ەكەندىگىن ايتىپ، قارسىلاستارىن ءوز سوزدەرىنە يلاندىرۋعا تىرىستى. ماسەلەن، اياۋلىم اۋىلدىق جەردە اعىلشىن تىلىندە ءبىلىم بەرەتىن مۇعالىمدەردىڭ تاپشى ەكەندىگىن ايتا كەلە، قالادا بۇل تۇرعىدان العاندا مۇمكىندىكتىڭ جوعارى ەكەنىن العا تارتتى.