بولجام بويىنشا، شامامەن ەكى تريلليوننان استام گالاكتيكا بار ەكەن. ونىڭ قاتارىندا قۇس جولى دا بار.
كەيبىر عالىمدار عالامدا تىرشىلىك ەتۋگە قولايلى پلانەتالار بار دەپ توپشىلايدى. ويتكەنى كۇن سەكىلدى جۇلدىزدار جەتەرلىك. ال ونى اينالا ۇشقان عالامشارلاردىڭ بىرەۋىندە تىرشىلىك كوزى بولۋى مۇمكىن.
NASA وبسەرۆاتورياسى 2009-جىلى 7- ناۋرىزدا عارىش ايلاعىنا جىبەرگەن «كەپلەر» تەلەسكوبى 2018-جىلى جۇمىسىن ماڭگى توقتاتتى. ونىڭ جانارمايى تاۋسىلعان ەكەن، ونىڭ ۇستىنە ءجيى ىستەن شىعاتىن بولعان. ءبىراق «كەپلەردىڭ» استرونومياداعى ەڭبەگى ەرەن. ول ءالى ناقتىلانباعان ەكزوپلانەتالاردى ەسەپتەمەگەندە كۇن جۇيەسىنەن تىس 2681 پلانەتانى انىقتاعان. قۇرىلعى اسپان الەمىنىڭ %0,25 زەرتتەپ ۇلگەرگەن.
قۇس جولىندا تىرشىلىك ەتۋگە قولايلى عالامشاردى ىزدەۋمەن اينالىساتىن عالىمدار الدىمەن كۇنگە ۇقساس جۇلدىزدى انىقتاۋعا تىرىستى. دالىرەك ايتقاندا، بەتكى قاباتىنىڭ تەمپەراتۋراسى تسەلسيي بويىنشا 4500-6000 گرادۋس ارالىعىندا بولاتىن قىزىل جۇلدىز قاجەت ەدى. «كەپلەر» انىقتاعان عالامشارلاردىڭ كوبى ءوز جۇلدىزىنان تىرشىلىك ەتۋگە قولايلى قاشىقتا ورنالاسقان.
ول پلانەتالاردا تەمپەراتۋرا تىم ىستىق تا، سۋىق تا ەمەس. ال سىرت كەلبەتى مەن مولشەرى بارىنشا جەرگە ۇقساس.
وسى ەرەكشەلىكتەردى ۇستانا وتىرىپ، «كەپلەر» تەلەسكوبى تەك قۇس جولىندا كۇنگە ۇقساس 300 ميلليون جۇلدىزدى تاپقان. ولاردىڭ ءارقايسىندا تىرشىلىك بولۋى مۇمكىن. بۇعان قوسا عالىمدار 3-4 قىزىل جۇلدىز جەردەن «بار بولعانى» 30 جارىق جىل قاشىقتا ەكەنىن انىقتاعان. عالام بىرلىگىمەن الىپ قاراعاندا بۇل اسا الىس قاشىقتىق ەمەس.
massaget.kz