«گازوپروۆود 4ا كوشەسىندەگى گاز رەزەرۆۋارى ورنالاسقان قويمادا ءورت شىقتى. قويما ىشىندە جارىلىس داۋىستارى ەستىلىپ جاتىر»، - دەدى اگەنتتىككە دەرەككوز.
ورتكە قاۋىپتىڭ «جوعارى» دەڭگەيى بەرىلىپ وتىر. جارىلىستىڭ ورىن الۋ مۇمكىندىگىنە بايلانىستى وقيعا ورنىنا جەتكەن ءورت سوندىرۋشىلەر قاۋىپسىز اراقاشىقتىقتى ساقتاۋدا.
«قويماداعى گازعا ارنالعان رەزەرۆۋاردىڭ جالپى كولەمى 600 تەكشە مەتردى قۇرايدى»، - دەلىنگەن مالىمەتتە.
ورتكە ورانعان قويمادا بىرنەشە قۋاتتى جارىلىس ورىن العان. سول سەبەپتى قازىرگى ۋاقىتتا ءورت سوندىرۋشىلەر بروندالعان قورعانىستىڭ جەتكىزىلگەنىن كۇتىپ تۇر. ر ف ت ج م ماسكەۋ قالالىق باسقارماسىنىڭ باسپا ءسوز قىزمەتى دە ءورتتىڭ ورىن العانىن راستادى.
«قويما عيماراتىندا ءورت بولىپ جاتىر. الدىن الا بولجامعا سايكەس، ونىڭ ىشىندە گاز باللوندارى بار. نەنىڭ ورتەنىپ جاتقانى جانە قىزىل جالىن شارپىعان اۋماق ناقتىلانۋدا. زارداپ شەككەندەر جوق»، - دەدى قالالىق باسقارمادان.
گاز باللوندارى بار قويما عيماراتىنىڭ قيراعانى دا بەلگىلى بولىپ وتىر.
«باللوندار ساقتالعان عيمارات قيراعان. ورتتەن قورعاۋ قىزمەتىنىڭ جەكە قۇرامى تەحنيكالىق قاۋىپسىزدىك ەرەجەلەرىن ساقتاي وتىرىپ، قىزىل جالىنمەن كۇرەس جۇرگىزىپ جاتىر. زارداپ شەككەندەر تۋرالى اقپارات تۇسكەن جوق. ماماندار مەن تەحنيكا جەتكىلىكتى»، - دەدى ر ف ت ج م ماسكەۋ قالالىق باسقارماسىنان.
ال ت ا س س اگەنتىگىنىڭ جەدەل قىزمەتتەگى دەرەككوزى عيماراتتىڭ جارىلىس سالدارىنان قيراعانىن ايتادى. سونىمەن قاتار ول توتەنشە جاعداي ورىن العان اۋماققا جاقىن ورنالاسقان ۇيلەردىڭ تۇرعىندارىن ەۆاكۋاتسيالاۋ جۇرگىزىلمەگەندىگىن اتاپ وتەدى.
«ءورت قۇشاعىنا ورانعان انگارعا تاقاۋ ورنالاسقان تۇرعىن ۇيلەردەن ادامداردى قاۋىپسىز جەرگە شىعارۋ جۇرگىزىلگەن جوق. كولىك قوزعالىسىنا شەكتەۋ ەنگىزىلگەن»، - دەدى ول.