الىپپە مەن انا ءتىلى وقۋلىقتارىمەن وقىتۋ ءتارتىبى ايقىندالدى

نۇر-سۇلتان. قازاقپارات - «الىپپە» وقۋلىعى وقۋشىنىڭ جاس ەرەكشەلىگىنە بايلانىستى جازىلدى. بۇل تۋرالى ق ر ءبىلىم جانە عىلىم ۆيتسە-ءمينيسترى شولپان كارينوۆا ءمالىم ەتتى، دەپ حابارلايدى قازاقپارات ءتىلشىسى.

2021 -جىلى «الىپپە» ەنگىزىلەدى - ءبىلىم مينيسترلىگى «جاز كەزىندە «الىپپە» وقۋلىعىنا بايلانىستى وزگەرىستەر مەملەكەتتىك ستاندارتقا ەنگىزىلگەنىن حابارلاعان ەدىك. قازىرگى كەزدە «الىپپە» وقۋ باعدارلاماسىن جاساۋدىڭ جۇمىسى اياقتالىپ، بەكىتىلدى.

«الىپپەنى» ەنگىزۋدىڭ، قايتارۋدىڭ ماڭىزى زور ەكەنىن اتاپ وتكىم كەلەدى. سەبەبى «الىپپە» العاشقى وقۋلىق بولسا، ول مىندەتتى تۇردە وقۋشىنىڭ جاس ەرەكشەلىگىنە، فيزيولوگيالىق ەرەكشەلىگىنە بايلانىستى ساي بولۋى كەرەك. بالالار مەكتەپكە 6 جاستان قابىلدانادى. وسى ورايدا جۇمىس توبى اۋقىمدى شارالاردى اتقاردى»، - دەپ توقتالدى ش. كارينوۆا ورتالىق كوممۋنيكاتسيالار قىزمەتىندە.

ونىڭ ايتۋىنشا، 20 دان استام جۇمىس توبىنىڭ وتىرىسى وتكىزىلدى.

«بۇل تۇرعىدا عىلىمي نەگىزگە، تاجىريبەلىك قولدانىسقا قاتىستى بىرنەشە ۇسىنىس كەلىپ ءتۇستى. سونىڭ بارلىعى زەردەلەنىپ، ناقتى اۆتورلاردىڭ قاتىسۋىمەن جۇمىس توبى وزىنە تيەسىلى شارالاردى اتقاردى»، - ۆيتسە- مينيستر.

ءوز كەزەگىندە ى. التىنسارين اتىنداعى ۇلتتىق ءبىلىم اكادەمياسىنىڭ ورتا ءبىلىم ورتالىعىنىڭ ديرەكتورى مانارا اداموۆا جاڭارتىلعان ءبىلىم مازمۇنى 2016 -جىلدان ەنگىزىلگەننەن بەرى، ەلىمىزدە ءبىرىنشى سىنىپتان «ساۋات اشۋ» وقۋلىعى پايدالانىلىپ كەلگەنىن ەسكە سالدى.

«اتا-انالار تاراپىنان «الىپپەنى» ىزدەگەندەر كوپ بولدى. «ساۋات اشۋ» مەن «الىپپەنىڭ» ايىرماشىلىعىنا توقتالساق، «الىپپە» مەن «انا ءتىلى» وقۋلىقتارى «ساۋات اشۋدىڭ» ىشىنە كىرىكتىرىلگەن بولاتىن. ەندى قازىر ازىرلەنىپ جاتقان وقۋ باعدارلاماسىنا سايكەس شىعارىلاتىن «الىپپە» وقۋلىعى مەن «انا ءتىلى» بولەك بولادى. 2021-2022 وقۋ جىلىنان باستاپ ەكى وقۋلىقپەن ءبىرىنشى سىنىپ بالالارى ءبىلىم الادى»، - دەدى ورتالىق ديرەكتورى.

ونىڭ سوزىنە قاراعاندا، «الىپپە» 96-98 ساعات كولەمىندە ءبىرىنشى جارتجىلدىقتا وقىتىلادى. «الىپپەگە دەيىنگى» كەزەڭگە 2 اپتا ۋاقىت بولىنەدى. ودان كەيىن «الىپپە» وقۋلىعى بويىنشا وقىتۋ جالعاستىرىلادى.

«قاڭتار ايىنان باستاپ، ياعني ءۇشىنشى توقسانعا كوشكەن كەزەڭنەن وقۋ مەن جازۋدى جەتىلدىرۋ ءۇشىن «انا ءتىلى» وقۋلىعىنىڭ اياسىندا وقىتۋ جالعاستىرىلادى»، - دەدى م. اداموۆا. بۇدان بۇرىن حابارلانعانداي، «الىپپەنى» ەنگىزۋ 2021-2022 -جىلعا جوسپارلانعان. بيىل تامىز ايىندا ق ر ءبىلىم جانە عىلىم ءمينيسترى اسحات ايماعامبەتوۆ وزگەرىستىڭ اياسىندا مەكتەپ باعدارلاماسىنا سايكەس، 1-سىنىپتارعا 1-2-توقسان «الىپپە»، 3-4-توقسان «انا ءتىلى» ەنگىزىلەتىنىن ايتقان ەدى.

اۆتور: رۋسلان عابباسوۆ