بۇل تۋرالى ق ر پرەمەر-ءمينيسترىنىڭ ورىنباسارى ەرالى توعجانوۆتىڭ سەنات دەپۋتاتتارى ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
ايتا كەتەرلىگى، سەنات دەپۋتاتتارى كونتينگەنتى 181 دەن 600 ادامعا دەيىنگى، ءبىر سىنىپتاعى بالالاردىڭ سانى 15 وقۋشىدان اسپايتىن اۋىلدىق جەرلەردە ورنالاسقان مەكتەپتەردىڭ جۇمىسىن كەزەڭ-كەزەڭىمەن قايتا باستاۋعا قاتىستى دەپۋتاتتىق ساۋال جولداعان ەدى.
«ۇكىمەت مەكتەپ وقۋشىلارىن قاشىقتان وقىتۋعا كوشىرۋ تۋرالى شەشىمدى فاكتورلار كەشەنىن، ونىڭ ىشىندە مەكتەپ وقۋشىلارى اراسىندا COVID-19 دىڭ تارالۋىنىڭ ەپيدەميولوگيالىق تاۋەكەلدەرىن، باستاۋىش سىنىپ وقۋشىلارىنىڭ قاشىقتىقتان وقىتۋعا بەيىمدىلىگىن، مەكتەپتەردىڭ شامادان تىس تىعىزدالۋىن قوسا العاندا، ماتەريالدىق- تەحنيكالىق جاراقتاندىرىلۋىن ەسكەرە وتىرىپ قابىلدادى. مەكتەپتەردە بالالار اراسىندا سىرقاتتانۋشىلىقتىڭ الدىن الۋىنا باعىتتالعان نەگىزگى شارالار سىنىپتا جانە مەكتەپتە كوپ جينالۋعا جول بەرمەۋ، وقۋ جانە ۇزىلىستەر كەزىندە قاشىقتىقتى ساقتاۋ مۇمكىندىگى، مەكتەپتە ماسكا رەجيمىن جانە ەپيدەمياعا قارسى قاتاڭ شارالاردى ساقتاۋ بولىپ سانالادى. بۇل رەتتە، وقۋشىلاردىڭ، اسىرەسە ورتا جانە جوعارى سىنىپ وقۋشىلارىنىڭ مەكتەپتە كورسەتىلگەن تالاپتاردى ساقتاۋىن قامتاماسىز ەتۋ ايتارلىقتاي كۇردەلى. بۇدان باسقا، كارانتين رەجيمىنىڭ بەلگىلەنگەن تالاپتارى ساقتالماعان كەزدە جابىق ءۇي- جايلاردا بالالاردىڭ كوپ شوعىرلانۋى اۋرۋدىڭ تارالۋ قاۋپىن تۋدىرادى»، - دەيدى ۇكىمەت باسشىسىنىڭ ورىنباسارى دەپۋتتارعا قايتارعان جاۋابىندا.
سونىمەن قاتار ول باستاۋىش سىنىپ وقۋشىلارى اتا- انالارىنىڭ وتىنىشتەرى بويىنشا سانيتاريالىق- ەپيدەميولوگيالىق تالاپتاردى قاتاڭ ساقتاي وتىرىپ، كەزەكشى سىنىپتا ءبىلىم الىپ جاتقانىنا نازار اۋدارتادى. بۇل رەتتە سىنىپتى 15 بالادان كىشى توپتارعا ءبولۋ، اۋىسىمدار مەن كىشى اۋىسىمداردىڭ سانىن ۇلعايتۋ، كابينەتتىك جۇيەنى الىپ تاستاۋ، ءار ءتۇرلى ۋاقىتتاعى ۇزىلىستەر، ءبىرجاقتى قوزعالىس جۇيەسى، كىرەبەرىستە كۇندەلىكتى تەمپەراتۋرانى ولشەۋ، سىنىپتاعى بالالاردىڭ جاي- كۇيىن باقىلاۋ، جەلدەتۋ، كۆارتستاۋ، ءۇي-جايلاردى ىلعالدى جيناۋ، مەديتسينالىق كابينەتتەر مەن يزولياتورلاردىڭ ۇزدىكسىز جۇمىس ىستەۋى، مەكتەپتە قاتاڭ ماسكا رەجيمى قامتاماسىز ەتىلگەن. «بۇدان باسقا، ءجىتى رەسپيراتورلىق ينفەكسيالاردىڭ كۇتىلەتىن اعىمدىق جاعدايىندا ۇيىمداستىرىلعان جابىق ۇجىمداردى قالىپتاستىرۋ كوروناۆيرۋستىق ينفەكسيانىڭ بەرىلۋ تاۋەكەلىن ەداۋىر ارتتىراتىنىن اتاپ ايتۋ كەرەك، بۇل ينفەكسيانىڭ ءبىلىم الۋشىلار، پەداگوگتار مەن اتا-انالار اراسىندا تەز تارالۋىنا اكەلۋى مۇمكىن. وسىعان بايلانىستى دەنساۋلىق ساقتاۋ مينيسترلىگى بارلىق مەكتەپتەردى شتاتتىق وقىتۋ فورماتىنا كوشىرۋدى ەرتە دەپ سانايدى. بۇگىنگى كۇنى ءبىرقاتار شەت ەلدەردە (گەرمانيادا، رەسەيدە، انگليادا، پولشادا، فرانسيادا، ا ق ش-تا، وڭتۇستىك كورەيادا، ءۇندىستاندا) كۇندىزگى وقۋ كەزىندە كوروناۆيرۋستىڭ تەز تارالۋىنا بايلانىستى مەكتەپتەر كارانتينگە جابىلۋدا»، - دەيدى ول.
ۇكىمەت باسشىسى ورىنباسارىنىڭ دەرەگىنشە، وسى جىلعى 25-قازاندا ەلىمىزدە وقۋشىلار اراسىندا COVID-19 اۋرۋىنىڭ 298 جاعدايى تىركەلدى. ونىڭ 127 سى وفلاين رەجيمدە جانە 171 ى قاشىقتان وقىعان.
«ق ر اۋماعىندا كوروناۆيرۋستىق ينفەكسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا 2020 -جىلعى 26-قازاندا 2020-2021 وقۋ جىلىنىڭ ەكىنشى توقسانىنان باستاپ كونتينگەنتى 300 وقۋشىعا دەيىنگى قالالىق جانە اۋىلدىق مەكتەپتەردى ءداستۇرلى وقىتۋ فورماتىنا كوشىرۋ، اتا- انالاردىڭ ءوتىنىشى بويىنشا جالپى ءبىلىم بەرەتىن مەكتەپتەردە 1 دەن 5-سىنىپقا دەيىن، حالىقارالىق مەكتەپتەردە 7-سىنىپقا دەيىن كەزەكشى سىنىپتاردا وقىتۋعا رۇقسات ەتۋ تۋرالى شەشىم قابىلدادى. ءبىلىم بەرۋ پروتسەسىنىڭ ساپاسىن قامتاماسىز ەتۋ، قاشىقتىقتان وقىتۋ كەزەڭىندە بالالاردىڭ بىلىمىندەگى ىقتيمال ولقىلىقتاردىڭ ورنىن تولتىرۋ ماقساتىندا ءبىلىم جانە عىلىم مينيسترلىگى جەرگىلىكتى اتقارۋشى ورگاندارمەن بىرلەسىپ نەگىزگى پاندەر بويىنشا ءبىلىم قيمالارىن دياگنوستيكالاۋ، بالالاردىڭ وقۋ جەتىستىكتەرىن اتا-انالارعا ءتۇسىندىرۋ، ارتتا قالعان وقۋشىلار ءۇشىن جەكە كونسۋلتاتسيالار، كانيكۋلدىق مەكتەپتەر جانە اتا- انالار مەن بالالاردىڭ قالاۋى بويىنشا كونسۋلتاتسيالىق ونكۇندىكتەر وتكىزۋ بويىنشا جۇمىس جۇرگىزۋدە»، - دەيدى ەرالى توعجانوۆ. پرەمەر-مينيستر ورىنباسارى ەلىمىزدىڭ دەنساۋلىق ساقتاۋ مينيسترلىگى حالىق اراسىندا، ونىڭ ىشىندە مەكتەپ وقۋشىلارى مەن ءبىلىم بەرۋ ۇيىمدارىنىڭ پەرسونالى اراسىنداعى سىرقاتتانۋشىلىققا كۇندەلىكتى تالداۋ جۇرگىزەتىندىگىن، مەكتەپتەردىڭ كارانتين رەجيمىندە جۇمىس ىستەۋگە دايىندىعىن باعالايتىندىعىن اتاپ وتەدى.
«وسىنىڭ ءبارىن ەسكەرە وتىرىپ، د س م مۇددەلى مەملەكەتتىك ورگاندارمەن بىرلەسىپ، قاۋلىعا كونتينگەنتى 300 وقۋشىعا دەيىنگى قالالىق جانە اۋىلدىق مەكتەپتەردى ءداستۇرلى وقىتۋ فورماتىنا كوشىرۋ، 1-5 سىنىپتاردىڭ كەزەكشى سىنىپتارىندا (اتا-انالاردىڭ ءوتىنىشى بويىنشا)، حالىقارالىق مەكتەپتەردە 7 سىنىپقا دەيىن (2020-2021 وقۋ جىلىنىڭ ەكىنشى توقسانىنان باستاپ) وقىتۋعا رۇقسات ەتۋ بولىگىندە وزگەرىس ەنگىزەدى»، - دەيدى ۇكىمەت باسشىسىنىڭ ورىنباسارى.
اۆتور: مارلان جيەمباي