نۇر-سۇلتاندا اۆتوكولىك ۇرلاۋمەن اينالىسىپ كەلگەن قىلمىستىق توپ ۇستالدى

باسپا ءسوز قىزمەتىنىڭ دەرەكتەرىنە قاراعاندا، جەدەل-ىزدەستىرۋ شارالارىن جۇرگىزۋ بارىسىندا ەلوردالىق پوليتسيا قىزمەتكەرلەرى كۇدىكتىلەردىڭ ىزىنە ءتۇستى.

ولار مىنگەن «حيۋنداي اۆانت» ماركالى كولىگى ابىلايحان داڭعىلى بويىندا توقتاتىلدى.

ەسىكتى ىشىنەن جاۋىپ العان ەكى كۇدىكتى كولىك سالونىنان شىعۋدان باس تارتقان. پوليتسيا كولىكتىڭ اينەكتەرىن سىندىرىپ، كۇدىكتىلەردى الىپ شىقتى.

39 جانە 42 جاستاعى ۇستالعان ەكى ادام ەلوردا تۇرعىندارى بولپ شىقتى.

ولار بيىلعى جىلدىڭ 20- قازانىنان بەرى جاسالعان بەس اۆتوكولىك ۇرلىعىنا قاتىسى بار دەگەن كۇدىككە ءىلىندى.

ءبىر عانا «شارىن» بازارىنىڭ وزىندە كۇدىكتىلەر ءۇش اۆتوكولىك ۇرلاعان. ماسەلەن، 29- قازاندا بازاردا بولعان 39 جاستاعى كۇدىكتى سكانەرلەۋ قۇرىلعىسى ارقىلى «لاند كرۋزەر» ماركالى اۆتوكولىگىن اشقان.

بۇل ۋاقىتتا اۆتوموبيل سالونىندا كىشكەناي بالا وتىرعان جانە ونىڭ قولىندا «حۋاۆەي» ماركالى ۇيالى تەلەفون بولعان. كۇدىكتى بالانىڭ قولىنداعى تەلەفونىن الىپ، وقيعا ورنىنان ءىزىن سۋىتقان. اناسى ساۋدا جاساپ بولىپ، كولىككە ورالعان كەزدە بولعان جاعداي تۋرالى بىلگەن سوڭ پوليتسياعا حابارلاعان. قازىر ق ر ق ك 188-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.