كوروناۆيرۋس قانداي اۋرۋلارى بار ادامدار ءۇشىن قاۋىپتى ەكەنى ايتىلدى

نۇر-سۇلتان. قازاقپارات - قازىر دارىگەرلەر COVID-19-دىڭ سالدارىن، ىندەتتىڭ جالپى ادام اعزاسىنا اسەرىن جان-جاقتى زەرتتەۋدە.

بۇل جاڭا ينفەكسيا بولعاندىقتان، ماماندار ازىرگە ناقتى ءبىر توقتامعا كەلگەن جوق، دەپ حابارلايدى قازاقپارات ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.

دارىگەرلەردىڭ پايىمداۋىنشا، COVID-19 شالدىققاندارعا بۇرىنعى قالپىنا قايتا كەلۋ ءۇشىن ۇزاق ۋاقىت كەرەك، ويتكەنى ينفەكسيا وكپەنى عانا ەمەس، ادامنىڭ وزگە دە ورگاندارىن زاقىمدايدى. ينفەكسيا ءبىرىنشى كەزەكتە وكپەنى، كەيىن بۇيرەك، جۇرەك ، ۇيقى بەزىنىڭ جۇمىسىن بۇزادى. مۇنى ماماندار COVID-19 كەيىنگى سيندروم كەزىندە بايقاعان.

«كوۆيدتەن كەيىنگى سيندروم دەگەن تۇسىنىك بار. ول 2-3 ايدان كەيىن، ادام جازىلدىم-اۋ دەگەندە، ياعني ينفەكسيانىڭ اۋىر فازاسى وتكەن سوڭ پايدا بولادى. كوۆيدتەن جازىلىپ شىققان ناۋقاستاردى ەمدەيتىن ورتالىقتار ىندەتتەن كەيىنگى سيندرومنىڭ پراكتيكالىق بولىگىن زەرتتەۋدە، مىسالى، پاتسيەنتتىڭ بويىندا ناقتى بەلگىلەر بولادى. قازاقستانداعى تەكسەرۋ حاتتاماسىندا عىلىمي جانە حالىقارالىق تاجىريبە ەسكەرىلگەن»، - دەيدى «كارديوحيرۋرگيا ۇلتتىق عىلىمي ورتالىعى» ا ق باسقارما ءتوراعاسىنىڭ مىندەتىن اتقارۋشى ماحاببات بەكبوسىنوۆا.

سوندىقتان كوۆيدتەن جازىلىپ شىققان پاتسيەنت مەديتسينالىق وڭالتۋدان ءوتۋ كەرەك. ماحاببات بەكبوسىنوۆانىڭ ايتۋىنشا، كوۆيدتەن كەيىن قان قىسىمى كوتەرىلگەن ناۋقاس سانى كوبەيگەن. مۇنداي پاتسيەنتتەرگە قالاي كومەكتەسەمىز؟ بۇل بۇكىل الەم دارىگەرلەرىن تولعاندىرىپ وتىرعان ماسەلە. كارديوحيرۋرگيا ۇلتتىق عىلىمي ورتالىعىندا كوۆيدتەن كەيىنگى پاتسيەنتتەرگە مەديتسينالىق قىزمەت كورسەتەتىن ورتالىق اشىلعان.

«كوۆيد بۇكىل ادامزاتقا سترەسس بولدى. جۇرەك- قانت تامىرلارى اۋرۋىنان قايتىس بولعاندار سانى كوبەيمەگەن. ءبىز اناليز جاساپ، وتكەن جىلمەن سالىستىردىق، وزگەرىس جوق. ءبىراق ينتەنسيۆتى تەراپيا بولىمشەسىندەگى جانساقتاۋ بولىمىندە جاتقانداردىڭ 50-70 پايىزىندا ارتەريالدىق گيپەرتەنزيا، ال قالعان 30 پايىزىندا قانت ديابەتى، ياعني كوروناۆيرۋستان كەيىن قانت ديابەتى پايدا بولعان»، - دەيدى م. بەكبوسىنوۆا.

دارىگەرلەر ءوز بەتىنشە ەمدەلۋگە مۇلدەم بولمايتىنىن ەسكەرتەدى. قازىر ادامدار ينتەرنەتتەن ءتۇرلى ءتاسىل ىزدەپ تاۋىپ، دارىگەردىڭ كەڭەسىنسىز ءجيى ەمدەلەتىن بولعان. دەنساۋلىعىڭىز سىر بەرسە، دەرەۋ جەدەل جاردەم شاقىرىڭىز. جۇرەكتىڭ جاۋى - اشۋ-ىزا، سترەسس. ۇنەمى كۇيبەلەڭ كۇيدە جۇرەتىن، بولماشى دۇنيەگە اشۋلانىپ، سارى ۋايىمعا سالىنعان ادامنىڭ جۇرەگى ءتۇبى ءبىر سىر بەرەدى. جۇرەك جاقسى جۇمىس ىستەۋ ءۇشىن ادامنىڭ جۇيكە-جۇيەسى تىنىش بولۋ كەرەك. جۇرەكتىڭ ەكىنشى جاۋى - جالقاۋلىق.

تاماقتى تويا جەگەننەن، ارتىق سالماقتان قان تامىرلارى بىتەلەدى، جۇرەكتىڭ جۇمىسى اۋىرلايدى. ماماندار كوۆيدتەن كەيىن ۇنەمى قان قىسىمىن قاداعالاپ جۇرۋگە كەڭەس بەرەدى.

كەز كەلگەن ءدارىنى دارىگەر تاعايىنداۋ كەرەك، سەبەبى پرەپاراتتاردىڭ پايداسىمەن قاتار جاعىمسىز اسەرى دە بار. جۇرەككە كوكونىس، جەمىس- جيدەك، قۇرامىندا ماگنيي بار پايدالى تاعامدار جاقسى. كۇنىنە ەكى كەسە كوفە ىشۋگە بولادى. كەز كەلگەن ازىق- تۇلىكتى از مولشەردە تۇتىنعان دۇرىس.